Amérika qit'eler ara uchidighan bashqurulidighan bombilarni tosush siniqi élip baridu

Muxbirimiz jüme
2017-05-27
Share

Amérika herbiy da'iriliri kéler hepte bir qit'eler ara uchidighan bashqurulidighan bombilarni tosush siniqi élip baridiken.

Amérika dölet mudapi'e ministirliki qarmiqidiki bashqurulidighan bomba mudapi'e idarisining jüme küni bildürüshiche, sinaq kéler seyshenbe künige orunlashturulghan.

Melum bolushiche, sinaq kaliforniye shtatigha jaylashqan wandenbérg hawa armiye bazisi we amérikining marshal taqim arallirigha jaylashqan kwajaléyn atol hawa armiye bazisida élip bérilidiken.

Qit'eler ara uchidighan bashqurulidighan bombigha teqlid qilin'ghan modél bomba kwajaléyn atol hawa armiye bazisidin amérikigha qaritip étilghandin kéyin, bu xildiki bombilarni pachaqlighuchi bomba kaliforniye wandenbérg hawa armiye bazisidin qoyup bérilidiken.

Eger sinaq pilan boyiche mangsa pachaqlighuchi bomba amérikigha qarap étilghan bombini tinch okyan hawa boshluqida tosup pachaqlap tashlaydiken.

Birleshme agéntliqida neqil qilishiche, amérika dölet mudapi'e ministirliqi bashqurulidighan bomba mudapi'e idarisining bayanatchisi kristofér jonson qit'eler ara uchidighan bashqurulidighan bombigha teqlid qilip yasalghan bombining esli bombigha qarighanda tézrek uchidighanliqini bildürgen.

Kristofér jonson teqlidiy bombining shimaliy koréyening bombilirigha teqlid qilinmighanliqini alahide eskertken bolsimu, mezkur bomba qalqan sistémisi siniqining shimaliy koréye bashqurulidighan bomba téxnikisini barghanche ilgharlashturiwatqan mezgilge toghra kelgenliki diqqet qozghighan.

Shimaliy koréye bu ay ichidila ikki qétim ottura musapilik bashqurulidighan bomba siniqi élip barghan.

Sinaqning netijilik bolghanliqi ilgiri sürülgen bolsimu, emma bu heqte toxtalghan jenubiy koréye da'iriliri bu bombilarning amérikining gu'am arilidiki herbiy eslihelirige zerbe bergüdek yiraqqa baralmaydighanliqini bildürüshken.

Bu hepte shimaliy koréyening bashqurulidighan bomba téxnikisi heqqide toxtalghan amérika dölet mudapi'e ministirliki razwédka bölümining diréktori léyténant général winsént stéwart tedbir élinmighan teqdirde kim jung'unning bashqurulidighan bomba sinaqlirida ghelibe qazinip kétishi mumkinlikini bildürgen idi.

Melumatlargha qarighanda, amérikining kaliforniyedin, haway arilighiche bolghan 36 orunda bashqurulidighan bomba tosush esliheliri bar iken.

Amérika 1999-yilidin buyan bashqurulidighan bombilarni tosup pachaqlaydighan qalqan sistémilirini sinaq qilishqa bashlighan. Buning axirqi qétimqisi 2014-yili élip bérilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet