Amérika hökümiti ündidar we tik-tokni cheklidi

Yéqindin buyan xelq'arada zor bes-munazirige seweb boluwatqan ündidar we tik-tok heqqide amérika hökümiti resmiy qarar aldi. “Kündilik xewerler” gézitining 18-séntebirdiki xewiride éytilishiche, amérika hökümiti 20-séntebirdin bashlap ündidarni resmiy men'iy qilish heqqide qarar alghan. Xewerde bu qararning élinishidiki eng muhim sewebning dölet bixeterlik mesilisi ikenliki éytilghan.

Xewerde éytilishiche, mezkur qararda ündidarni men'iy qilish bilen birge tik-tokmu men'iy qilin'ghan. Emma tik-tokni men'iy qilish buyruqi 12-noyabirdin bashlap küchke bolidighan bolup, bu muddetkiche mezkur epni ishlitishke bolidiken. Amérika soda ministirliqining ministiri wilbur ros bu heqte söz qilip: “Eger biz éytqan bir qisim bixeterlik tedbirliri bu epke ornitilsa, buning dawamliq ishlitilsh éhtimalliqi bar,” dégen.

Wilbur ros bu heqtiki yazma bayanatida özlirining amérika prézidénti donald trampning körsetmisi boyiche xitay hökümiti dawam qilduriwatqan amérika xelqining xususiy uchurlirini toplash qilmishini cheklesh, amérikaning dölet qimmiti we démokratiye qimmiti chüshenchilirini qoghdash üchün bu tedbirning élin'ghanliqini alahide tekitligen.

Xewerde éytilishiche, ündidar we tik-tokqa oxshash köpligen epler istémalchilarning uchurlirini toplaydighan bolsimu, bu ikki ep bashqa eplerge oxshimaydighan halda xitay hökümitining kontrolluqida bolghachqa hökümet herqachan uning sanliq melumat ambirigha kireleydiken. Del mushu sewebtin bu eplerni chüshürgen hemde amérika tupriqida yashawatqan herqandaq kishining xususiy uchuri herwaqit xitay kompartiyesining ixtiyarida bolidiken.