Американиң бир уруш парахоти җәнубий деңизда хитайниң игилик һоқуқ тәлипигә хирис қилди

Мухбиримиз әркин
2019-05-20
Елхәт
Пикир
Share
Принт

Америка деңиз армийәсиниң «пребол» намлиқ уруш парахоти 19‏-май күни хитай армийәси җәнубий деңизда игиләп турған скарборов арилиға 12 деңиз мили йеқинлашқан.

Америка һәрбий тәрәпниң қәйт қилишичә, «пребол» ниң бу аралға йеқинлишиши хитайниң җәнубий деңиздики аралларни «зорлуқ билән игилиши» ға қарши қилинған бир «хирис» икән. «Пребол» намлиқ башқурулидиған бомба парахотиниң һәрикити америка-хитай сода сөһбити мәғлуп болуп, икки дөләт мунасивити кәскинлишип кәткән бир мәзгилдә елип берилған. «Ню-йорк почтиси» гезитиниң хәвәр қилишичә, бу вәқәни америка деңиз армийәси 7‏-пилотиниң баянатчиси кләйтон дос дүшәнбә күни елан қилған баянатида ашкарилиған.

У, «пребол скарборов арилиға 12 деңиз мили йеқинлишип, деңиз йолиниң зорлуқ билән игиливелинишиға қарши риқабәт елан қилди. Шуниңдәк хәлқара қанун бойичә деңиз қатнишини қоғдашни иҗра қилди» дегән. Кләйтон досниң қәйт қилишичә, бу америка уруш парахотлириниң бу ай ичидә җәнубий деңизда елип барған 2‏-қетимлиқ деңиз әркин қатнишини қоғдаш һәрикити икән. Буниң алдида, бу айниң 6‏-күни америкиниң «пребол» билән «чуң-‏һун» намлиқ йәнә бир уруш парахоти хитай игиләп турған спратлей тақим араллириниң гавен, җонсон араллириға 12 деңиз мили йеқинлашқан. Хитай һөкүмити президент обама дәвридә мәзкур райондики марҗан араллирини тиндуруп, арал ясиған, шуниңдәк бәзи аралларға һәрбий әслиһәләрни орунлаштурған. Хитайниң җәнубий деңизни һәрбийләштүрүши трамп һөкүмитиниң қаттиқ риқабитигә учрап кәлмәктә. Кләйтон дос баянатида йәнә бу райондики «барлиқ мәшғулатлар хәлқара қанун бойичә елип берилмақта. Америка һава, деңиз мәшғулатини йолға қоюп, хәлқара қануни йол вә қойған даиридә һәрикитини давамлаштуриду» дегән.

Пикирләр (0)
Share
Толуқ бәт