Amérikaning bir urush paraxoti jenubiy déngizda xitayning igilik hoquq telipige xiris qildi

Muxbirimiz erkin
2019-05-20
Élxet
Pikir
Share
Print

Amérika déngiz armiyesining "Prébol" namliq urush paraxoti 19‏-may küni xitay armiyesi jenubiy déngizda igilep turghan skarborow ariligha 12 déngiz mili yéqinlashqan.

Amérika herbiy terepning qeyt qilishiche, "Prébol" ning bu aralgha yéqinlishishi xitayning jenubiy déngizdiki arallarni "Zorluq bilen igilishi" gha qarshi qilin'ghan bir "Xiris" iken. "Prébol" namliq bashqurulidighan bomba paraxotining herikiti amérika-xitay soda söhbiti meghlup bolup, ikki dölet munasiwiti keskinliship ketken bir mezgilde élip bérilghan. "Nyu-york pochtisi" gézitining xewer qilishiche, bu weqeni amérika déngiz armiyesi 7‏-pilotining bayanatchisi kleyton dos düshenbe küni élan qilghan bayanatida ashkarilighan.

U, "Prébol skarborow ariligha 12 déngiz mili yéqinliship, déngiz yolining zorluq bilen igiliwélinishigha qarshi riqabet élan qildi. Shuningdek xelq'ara qanun boyiche déngiz qatnishini qoghdashni ijra qildi" dégen. Kleyton dosning qeyt qilishiche, bu amérika urush paraxotlirining bu ay ichide jenubiy déngizda élip barghan 2‏-qétimliq déngiz erkin qatnishini qoghdash herikiti iken. Buning aldida, bu ayning 6‏-küni amérikining "Prébol" bilen "Chung-‏hun" namliq yene bir urush paraxoti xitay igilep turghan spratléy taqim arallirining gawén, jonson arallirigha 12 déngiz mili yéqinlashqan. Xitay hökümiti prézidént obama dewride mezkur rayondiki marjan arallirini tindurup, aral yasighan, shuningdek bezi arallargha herbiy eslihelerni orunlashturghan. Xitayning jenubiy déngizni herbiyleshtürüshi tramp hökümitining qattiq riqabitige uchrap kelmekte. Kleyton dos bayanatida yene bu rayondiki "Barliq meshghulatlar xelq'ara qanun boyiche élip bérilmaqta. Amérika hawa, déngiz meshghulatini yolgha qoyup, xelq'ara qanuni yol we qoyghan da'iride herikitini dawamlashturidu" dégen.

Toluq bet