Amérikaning nishanni xitayning Uyghur emgek küchlirini yötkishige qaritishi chaqiriq  qilindi

Amérikadiki “Menbe zhurnili” namliq torda élan qilin'ghan bir maqalida, amérika hökümitining “Uyghur mejburiy emgikining aldini élish qanuni” ni ijra qilishta nishanni xitayning Uyghur emgek küchlirini yötkishige qaritishi chaqiriq qilin'ghan. “Yéshil amérika” teshkilatining adil emgek hoquqi diréktori sharlot téyt qelemge alghan maqalida körsitilishiche, “Uyghur mejburiy emgikining aldini élish qanuni” ning ijra qilinishi 3-yilgha qedem qoyghan bir peytte, bu qanunni ijra qilish xizmet guruppisining xitayning dölet hamiyliqidiki Uyghur emgek küchlirini yötkesh pirogrammisigha qatnashqan Uyghur élining sirtidiki shirketlerni éniqlishi we cheklesh tizimlikige kirgüzüshni kücheytishi bek muhim iken. Bu chaqiriq amérika ana weten xewpsizliki ministirliqining yéqinqi ikki ay mabeynide, 29 xitay shirkitini Uyghur mejburiy emgikini cheklesh tizimlikige kirgüzüshining arqisidin élan qilindi.

Amérika ana weten xewpsizliki ministirliqi téxi yéqindila Uyghur mejburiy emgikini cheklesh tizimlikini xitayning béliqchiliq we alyumin sahesige kéngeytip, “Shinjang shinxu kömürchilik we éléktir shirkiti” ni öz ichige alghan besh xitay shirkitini cheklesh tizimlikige kirgüzgenidi. Lékin sharlot téytning körsitishiche, amérika hökümiti xitayning Uyghur emgek küchlirini yötkesh pirogrammisigha qatnashqan Uyghur élining sirtidiki xitay shirketlirini éniqlashta téximu köp tirishchanliq körsitishi kérek iken. Sharlot téyt, “Yéqinqi tetqiqatlar  xitay  hökümitining Uyghurlarni rayon sirtigha mejburiy yötkesh salmiqini ashurup, 2023-yili ‛shinjangning ölke halqighan emgek küchlirini yötkeshke qulayliq yaritip bérish‚ namida nishanliq yardem bérish pilanining kölimini körünerlik kéngeytikenliki” ni bayqighanliqi, bu mezgilde (Uyghur) emgek küchlirini xitayning bashqa rayonlirigha yötkeshning 38 pirsent artip, 2010-yilining otturiliridin buyanqi herqandaq waqittin éship ketkenlikini bildürgen.