Amérika hökümitidin mejburiy emgek mallirining dunya bazirigha kirelmeslikige kapaletlik qilish telep qilindi

Washin'gtondin muxbirimiz uyghar teyyarlidi
2024.04.17

Amérika-xitay riqabiti alahide komitéti” ning torida 17-aprél élan qilin'ghan mexsus xewerge asaslan'ghanda, mezkur komitétning re'isi mayk galigér (Mike Gallagher) bilen alahide ezasi raja kirishnamorti (Raja Krishnamoorthi) amérika tashqi ishlar ministiri antoniy bilinkén'gha xet yézip, xitay kompartiyesining Uyghur élide élip bériwatqan irqiy qirghinchiliqidin nep alidighan shirketlerning dunya bazirigha kirelmeslikige kapaletlik qilishini telep qilghan.

Mayk galigér bilen raja kirishnamortining imzasi bilen yézilghan bu xette mundaq déyilgen:

“Biz amérika hökümitining xitayning qollishidiki Uyghur mejburiy emgikige qarshi turush tirishchanliqini yuqiri pellige kötürüp, kishilik hoquqning dexli-teruzgha uchrishigha qarshi xelq'ara xizmetlerni kücheytishini telep qilimiz”.

 Mayk galigér we raja kirishnamorti bu xette, amérikining bir qisim ittipaqdashliri we shériklirining xitaydin mejburiy emgek mehsulatlirini import qilishni chekligenlikini qarshi alidighanliqini we lékin buning yéterlik emeslikini bildürüp mundaq dégen:

 “Biz Uyghur mejburiy emgek küchi ishlepchiqarghan tawarlarning yawropa we en'gliyege dawamliq éqip kirishidin we bu döletlerde “Tökme qilip sétilishi” tin endishe qilimiz”.

 Axirda mayk galigér we raja kirishnamorti amérika tashqi ishlar ministirliqining xitaydiki mejburiy emgek siyasetlirini toxtitish üchün dunyawi diplomatik tirishchanliqini kücheytip, herqaysi döletler bilen masliship, mejbur emgekke chétishliq tawarlarning dunya bazirigha kirelmeslikige kapaletlik qilishini telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.