Rusiyening "Komirsant géziti" de amérikining Uyghur mesilisige diqqet qiliwatqanliqi bayan qilindi

Muxbirimiz erkin
2018-05-11
Élxet
Pikir
Share
Print

Rusiyening "Komirsant géziti" de 10‏-may bir parche maqale élan qilinip, amérikining Uyghur rayonidiki kishilik hoquq depsendichilikige diqqet qiliwatqanliqi, yéqinda uning mezkur rayondiki xitay emeldarlirini agahlandurghanliqi ilgiri sürüldi. Maqalida "Washin'gtonning meqsiti xitay emeldarlirigha bésim ishlitip, xitayning gherbiy-shimal rayoni shinjangdiki musulman Uyghur millitini qoghdash" ikenliki tekitlen'gen.

"Uyghurlarning hoquqi: amérika-xitay soda urushidiki destek" serlewhilik bu maqalida, amérikining "Magnitskiy qanuni" ni ishqa sélip, Uyghurlarni xarlighan xitay emeldarlirigha émbargo qoyidighanliqini bildürgenliki, buning amérika-xitay soda urushi keskinleshken bir mezgilde otturigha qoyulghanliqi ilgiri sürülgen.

Maqalida yene amérikining bu herikitining xitayning Uyghur largha qaratqan siyasitige qandaq tesir körsitidighanliqi otturigha qoyulup, lékin buning ular oylighandek netije bermesliki, émbargoning sodidiki diplomatik ixtilapni kücheytiwétishi mumkinliki tekitlen'gen. Maqalida yene, xitay emeldarlirigha émbargo qoyulsa, xitayning basturushni téximu kücheytip, özining bésimgha tiz pükmeydighanliqini ipadilishi mumkinliki ilgiri sürülgen.

Amérikining muweqqet yardemchi dölet ishla ministiri lawra iston bu yil 4‏-ayda béyjingda xitay emeldarlirini agahlandurghan. Lawra istonning sözi kishilik hoquq teshkilatlirining qollishigha érishken. Ularning tekitlishiche, eger amérika magnitstkiy qanunini ishqa salsa, bu Uyghur rayonidiki xitay emeldarlirigha küchlük bésim peyda qilip, ularni oyliship ish qilishqa mejburlaydiken.

"Komirsant géziti" diki maqalida yene xitayning yéqindin 2 yildin béri "Térrorluqqa qarshi xelq urushi qozghap, mezkur rayondiki bixeterlikni zor derijide kücheytip kelgen" liki, xitay emeldarlirining bu rayonda "Ashqunluqqa qarshi turushni bahane qilip, diniy erkinlik cheklewatidu, kishilik hoquqqa xilapliq qiliwatidu" dep tenqidliniwatqanliqi bildürülgen.

Toluq bet