"Tom lentos insan heqliri komitéti" yawropa parlaméntida Uyghurlar mesilisini alahide tekitlidi

Muxbirimiz eziz
2018-05-18
Élxet
Pikir
Share
Print

15-May küni yawropa parlaméntida chaqirilghan "Xitaydiki insan heqliri mesilisining depsende bolushi" témisidiki muhakime yighinigha amérika dölet mejlisige qarashliq "Tom lentos insan heqliri komitéti" sin höjjitige élin'ghan xas bayanatni ewetti.

Mezkur komitétning tor bétide élan qilin'ghan yette minutluq bu sin höjjitide komitét re'isliridin randiy xaltgrén we jéymis mekgowérn mexsus Uyghurlar nöwette duch kéliwatqan siyasiy, iqtisad, medeniyet we din saheliridiki éghir basturushlarni sistémiliq we tepsiliy tonushturup, yawropa parlaméntini bundin kéyinki insan heqliri xizmitide Uyghurlarni zor küch bilen qollashqa chaqirghan.

Bayanatta komitét re'isi, shuningdek amérika awam palatasining ezasi randiy xaltgrén nuqtiliq qilip ötken on yil mabeynide Uyghurlarning medeniyet heqliri we diniy hoquqlirigha bolghan kontrolluqni barghanséri kücheytip kéliwatqanliqini, emdilikte bolsa xitay hökümitining bu xil kontrolluqni chet'ellergiche sozushqa urunuwatqanliqini bayan qilghan. Shundaqla xitay hökümiti ijra qiliwatqan zor kölemlik nazaret méxanizmining Uyghurlarni nishan qiliwatqanliqini, shuningdek közitish kaméraliri, teqlidiy eqil qatarliqlar birleshken halda pütkül Uyghurlar diyarining "Orwél"che nazaret sheklini alghan "Tejribixana"gha aylinip qalghanliqini janliq bayan qilghan.

U sözining axirida xitay hökümitining chet'ellerdiki insan heqliri pa'aliyetchilirining awazini öchürüsh üchün ularning xitayda qalghan uruq -tughqanlirini türmige solawatqanliqini, jümlidin Uyghur pa'aliyetchi rabiye qadir xanim hemde erkin asiya radi'osi Uyghur bölümi muxbirlirining bigunah tughqanlirining bu xil qilmishlarning nishani bolghanliqini tekitligen.

Komitét reslirining yene biri, amérika awam palatasining ezasi jéymis mekgowérn bolsa nuqtiliq qilip Uyghurlar duch kéliwatqan bu xil qattiq bésimlargha qarita yawropa parlaméntigha sunulghan teklip we tewsiyelerni bayan qilghan. U yene nöwette xitay hökümitining Uyghurlarning normal hayatigha kapaletlik qilishning ornigha Uyghurlarning milliy kimlikini weyran qilip, ularni pütünley assmilatsiye qiliwétish üchün pa'al heriketliniwatqanliqini alahide tekitligen. Uyghurlarning bu jehette yéqinqi birnechche yilda duch kéliwatqan éghir qismetlirige bolsa türmidiki Uyghur ziyaliysi ilham toxti we "Selkin" torining sabiq bashqurghuchisi gülmire éminni misalgha alghan hemde ularning muddetsiz qamaq jazasigha höküm qilin'ghanliqini tepsiliy bayan qilghan.

Toluq bet