Amérikida “Tunji nöwetlik xelq'ara Uyghur tarixi, medeniyiti we jem'iyiti tetqiqati” mawzuluq ilmiy muhakime yighini échildi

Bügün, amérika paytexti washin'gton'gha jaylashqan jorj washin'gton uniwérsitétida “Tunji nöwetlik xelq'ara Uyghur tarixi, medeniyiti we jem'iyiti tetqiqati”mawzuluq ilmiy muhakime yighini resmiy bashlandi.

Mezkur ilmiy muhakime yighini jorj washin'gton uniwérsitéti yawropa, rusiye we yawru-asiya tetqiqat institutining sahibxaniliq qilishi bilen échilghan. 27-Séntebir künigiche üch kün dawam qilidighan bu yighin'gha amérika, en'gliye, firansiye, gérmaniye, shiwétsiye, rusiye, awstraliye, türkiye, qazaqistan we tajikistan qatarliq döletlerdin kelgen köp sandiki tetqiqatchi, ilim ademliri qatnashti.

Yighinning échilish murasimigha jorj washin'gton uniwérsitétining proféssori, Uyghurshunas shawn robérts ependi riyasetchilik qildi. Échilish murasimining sherep méhmanliri süpitide dunya Uyghur qurultiyining re'isi rabiye qadir xanim, erkinlik sariyining bashliqi dawid kreymir, xelq'ara kechürüm teshkilati bashliqi ti kumar ependi, kishilik hoquq adwokati su gunawardina xanim, türkiye parlamént ezasi xaluq ahmet gümüsh ependiler qatnashti we söz qildi.

Yuqirida ismi tilgha élin'ghan méhmanlar birdek, xitay hökümitining Uyghurlargha qaratqan bésimi mislisiz kücheygen, téxi ikki kün awwal Uyghur ziyaliysi ilham toxti ömürlük qamaq jazasigha höküm qilin'ghan we Uyghur élida weziyet keskinlishiwatqan bir shara'it astida échilghan bu yighinning ehmiyitining zorluqini, uning Uyghur dawasining heqiqiy mahiyitini dunyagha körsitip bérishte muhim rol oynaydighanliqini qeyt qilishti. Échilish murasimigha yüzdin oshuq kishi qatnashti.