Jorji washin'gton uniwérsitétidiki Uyghurshunasliq muhakime yighini axirlashti

Muxbirimiz ümidwar
2014-09-28
Élxet
Pikir
Share
Print

Jorji washin'gton uniwérsitétning elli'ot xelq'ara munasiwetler mektipi, yawropa, rusiye we yawro-asiya tetqiqat institutining qarmiqidiki ottura asiya programmisi teshkilligen xelq'araliq Uyghurshunasliq muhakime yighini 27-séntebir küni axirlashti.

Üch künlük mezkur ilmiy muhakime yighinda 10 qétimliq muhakime uyushturulup, buningda Uyghurlarning tarixi, medeniyiti, tili, edebiyati, siyasiti, nopus, xelq'ara munasiwetler, ékologiye we bashqa türlük mesililerge béghishlan'ghan texminen 40 parche etrapida muhakime maqalisi oqup ötüldi.

Amérikida ötküzülgen mezkur ilmiy muhakime yighinida Uyghur tili resmiy xizmet tili qilip békitilgen bolup, maqaliler üch xil tilda oquldi we neq meydandin terjime qilindi. Her dölettin kelgen alimlar özlirining uzun yilliq tetqiqat köz qarashlirini otturigha qoydi.

Mezkur ilmiy muhakime yighini axirida yighinda oqulghan maqalilerni toplam süpitide neshr qilish hemde mundaq shekildiki ilmiy muhakime yighinni dawamlashturushni tekitlendi.

Uyghurshunasliq ilmi boyiche mundaq mexsus, chong kölemde, köp döletning tonulghan Uyghurshunasliri we Uyghur mesilisi tetqiqatchiliri qatnashqan yighin téxi bolup baqmighan idi. Shunga yighin'gha qatnashqan mutexessisler buning nahayiti ehmiyetlik bolghanliqini köp qétim tekitleshti we axirida pütün mutexessisler we anglighuchilar birdek halda yighinni teshkilligen jorji washin'gton uniwérsitéti ottura asiya programmisi rehberliri proféssor shon robérts, marélén we bashqilargha rehmet bildürdi. Bu yighin'gha amérika, rusiye, en'gliye, firansiye, türkiye, ottura asiya döletlirining bir qisim ataqliq Uyghurshunasliri qatnashqan bolup, buningdin kéyinki yighinlarda téximu köp dölet we téximu köp mutexessislerning qatnishishining muhimliqi tekitlendi. Yighindin kéyin yighin qatnashquchiliri üchün dala tamiqi pa'aliyiti uyushturuldi.

Toluq bet