CIA Башлиқи майк помпийо америка дөләт ишлири министирлиқиға көрситилди

Мухбиримиз ирадә
2018-03-14
Share

Америка президенти доналд трамп тәрипидин дөләт ишлири министирлиқиға намзат көрситилгән "америка мәркизи ахбарат идариси", йәни CIA ниң башлиқи майк помпийониң америкиниң хитай вә русийә қаритилған ташқи сиясәтләргә зор өзгиришләрни елип келидиғанлиқи тәхмин қилинмақта.

Сәйшәнбә күни, америка президенти трамп дөләт ишлири министири рекс тиллерсонни вәзиписидин қалдуруп, униң орниға CIA ни башлиқи майк помпийони көрсәткән иди. "бүгүнки америка" гезитидә елан қилинған мулаһизидә көрситилишичә, трампниң қарари бәзи сиясәт тәтқиқатчилириниң қарши елишиға еришкән. Чүнки улар майк помпийони америкиниң русийә вә хитайдин ибарәт икки риқабәтчиси вә уларға қаритилидиған ташқи сияситидә актип бир өзгириш ясайду, дәп қарайдикән.

Майк помпийо әйни вақитта "хитай америкиниң бихәтәрлики үчүн бир йошурун хәвп" дегүчиләрниң бири иди. У өткән йили 7-айда "вашингтон әркин көрсәткүч" гезитиниң зияритини қобул қилғанда, "хитайни америка үчүн әң зор тәһдит," дәп көрсәткән. У шу қетимлиқ сөзидә "мәнчә, хитай оттура вә узун муддәттә америкиға риқабәтчи болалайдиған иқтидарға игә. Хитай армийәси мәхсус америкиниң дунядики қудритигә қарши турушни көзлигән асаста өз күчини ашуруватиду. Буниң ипадилирини хитайниң җәнубий деңиздики, шәрқий деңиздики вә яки дуняниң башқа җайлиридики паалийәтлиридин көрүвалғили болиду," дегән иди.

"бүгүнки америка" гезитиниң хәвиридә, әгәр майк помпийониң дөләт ишлири министирлиқи америка дөләт мәҗлиси тәрипидин тәстиқланған тәқдирдә президент трампниң техиму актип ташқи сиясәт йүргүзүшигә йол ечилидиғанлиқи илгири сүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт