CIA Bashliqi mayk pompiyo amérika dölet ishliri ministirliqigha körsitildi

Muxbirimiz irade
2018-03-14
Share

Amérika prézidénti donald tramp teripidin dölet ishliri ministirliqigha namzat körsitilgen "Amérika merkizi axbarat idarisi", yeni CIA ning bashliqi mayk pompiyoning amérikining xitay we rusiye qaritilghan tashqi siyasetlerge zor özgirishlerni élip kélidighanliqi texmin qilinmaqta.

Seyshenbe küni, amérika prézidénti tramp dölet ishliri ministiri réks tillérsonni wezipisidin qaldurup, uning ornigha CIA ni bashliqi mayk pompiyoni körsetken idi. "Bügünki amérika" gézitide élan qilin'ghan mulahizide körsitilishiche, trampning qarari bezi siyaset tetqiqatchilirining qarshi élishigha érishken. Chünki ular mayk pompiyoni amérikining rusiye we xitaydin ibaret ikki riqabetchisi we ulargha qaritilidighan tashqi siyasitide aktip bir özgirish yasaydu, dep qaraydiken.

Mayk pompiyo eyni waqitta "Xitay amérikining bixeterliki üchün bir yoshurun xewp" dégüchilerning biri idi. U ötken yili 7-ayda "Washin'gton erkin körsetküch" gézitining ziyaritini qobul qilghanda, "Xitayni amérika üchün eng zor tehdit," dep körsetken. U shu qétimliq sözide "Menche, xitay ottura we uzun muddette amérikigha riqabetchi bolalaydighan iqtidargha ige. Xitay armiyesi mexsus amérikining dunyadiki qudritige qarshi turushni közligen asasta öz küchini ashuruwatidu. Buning ipadilirini xitayning jenubiy déngizdiki, sherqiy déngizdiki we yaki dunyaning bashqa jayliridiki pa'aliyetliridin körüwalghili bolidu," dégen idi.

"Bügünki amérika" gézitining xewiride, eger mayk pompiyoning dölet ishliri ministirliqi amérika dölet mejlisi teripidin testiqlan'ghan teqdirde prézidént trampning téximu aktip tashqi siyaset yürgüzüshige yol échilidighanliqi ilgiri sürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet