Президент трамп җон болтонни өзиниң дөләт хәвпсизлик мәслиһәтчиликигә тәйинлиди

Мухбиримиз әркин
2018-03-23
Елхәт
Пикир
Share
Принт

Америка президенти трамп америкиниң б д т да турушлуқ сабиқ баш әлчиси, америка ташқи сияситидики қаттиқ қол әрбаб җон болтонни өзиниң дөләт хәвпсизлик мәслиһәтчиликигә тәйинлиди.

Бирләшмә агентлиқниң хәвиридә тәкитлишичә, җон болтон америка-хитай мунасивәтлири сода вә тәйвән мәсилиси түпәйли назук бир мәзгилдә туруватқанда бу вәзипигә қоюлған. Җон болтон юқириқи һәр икки мәсилидә хитайға қаттиқ қол болушни тәшәббус қилип кәлгән кишиләрниң биридур.

У пәйшәнбә күни америка «фокус сода хәвәрлири» қанилиниң зияритини қобул қилип, хитайни америкиниң әқлий мүлүклирини оғрилаш, әркин базар содисиға хилаплиқ қилиш билән әйиблигән. Җон болтонниң илгири сүрүшичә, хитай «дуня сода тәшкилати» ниң әзалиқидин пайдилансиму, лекин хитай експорт мәһсулатлириға қошумчә ярдәм пули бериш, чәтәл карханилирини йәкләш қатарлиқ усуллар билән алдамчилиқ қилип кәлгән. Җон болтон мундақ дегән: «реаллиқ шуки, хитай өз пуқралириниң параванлиқиға бизниң дөлитимиз көңүл бөлгәндәк ундақ көңүл бөлмәйду. . Шундақла әң ямини улар әқлий мүлүкләрни оғрилаш, башқиларни техника өтүнүп беришкә қисташ қатарлиқ җәһәтләрдә түзүт қилип олтурмайду.»

Җон болтон илгири йәнә америкиниң «бир хитай сиясити» ни тәнқид қилған. У 2017‏-йили 2‏-айда «вашингтон әркин пәнәри» гезитидә қилған сөзидә, «‹бир хитай сиясити' мүҗмәл бир уқум. Уни хитай бир хил мәнидә, биз башқа бир хил мәнидә чүшинимиз,» дегән иди.

Бирләшмә агентлиқиниң хәвиридә көрситишичә, җон болтонниң бу вәзипигә тәйинлиниши трамп һөкүмитиниң техиму қаттиқ қол ташқи сиясәт йүргүзидиғанлиқини көрситидикән. Җон болтон сабиқ президент җорҗи бушниң дәвридә америкиниң б д т дики баш әлчиси болуп вәзипә өтигән иди.

Пикирләр (0)
Share
Толуқ бәт