Prézidént tramp jon boltonni özining dölet xewpsizlik meslihetchilikige teyinlidi
2018.03.23
Amérika prézidénti tramp amérikining b d t da turushluq sabiq bash elchisi, amérika tashqi siyasitidiki qattiq qol erbab jon boltonni özining dölet xewpsizlik meslihetchilikige teyinlidi.
Birleshme agéntliqning xewiride tekitlishiche, jon bolton amérika-xitay munasiwetliri soda we teywen mesilisi tüpeyli nazuk bir mezgilde turuwatqanda bu wezipige qoyulghan. Jon bolton yuqiriqi her ikki mesilide xitaygha qattiq qol bolushni teshebbus qilip kelgen kishilerning biridur.
U peyshenbe küni amérika “Fokus soda xewerliri” qanilining ziyaritini qobul qilip, xitayni amérikining eqliy mülüklirini oghrilash, erkin bazar sodisigha xilapliq qilish bilen eyibligen. Jon boltonning ilgiri sürüshiche, xitay “Dunya soda teshkilati” ning ezaliqidin paydilansimu, lékin xitay éksport mehsulatlirigha qoshumche yardem puli bérish, chet'el karxanilirini yeklesh qatarliq usullar bilen aldamchiliq qilip kelgen. Jon bolton mundaq dégen: “Ré'alliq shuki, xitay öz puqralirining parawanliqigha bizning dölitimiz köngül bölgendek undaq köngül bölmeydu. . Shundaqla eng yamini ular eqliy mülüklerni oghrilash, bashqilarni téxnika ötünüp bérishke qistash qatarliq jehetlerde tüzüt qilip olturmaydu.”
Jon bolton ilgiri yene amérikining “Bir xitay siyasiti” ni tenqid qilghan. U 2017-yili 2-ayda “Washin'gton erkin peneri” gézitide qilghan sözide, “‛bir xitay siyasiti‚ müjmel bir uqum. Uni xitay bir xil menide, biz bashqa bir xil menide chüshinimiz,” dégen idi.
Birleshme agéntliqining xewiride körsitishiche, jon boltonning bu wezipige teyinlinishi tramp hökümitining téximu qattiq qol tashqi siyaset yürgüzidighanliqini körsitidiken. Jon bolton sabiq prézidént jorji bushning dewride amérikining b d t diki bash elchisi bolup wezipe ötigen idi.