Доналд трамп хитайниң әқлий мүлүк оғрилиқлиридин һесаб алмақчи болғанлиқини билдүрди

Мухбиримиз ирадә
2018-01-18
Share

Америка президенти доналд трамп хитайниң әқлий мүлүк оғрилиқлирини қаттиқ җазалашни ойлишиватқанлиқини билдүрди. Ройтерс агентлиқиниң хәвәр қилишичә, чаршәнбә күни президент трамп вә униң иқтисад мәслиһәтчиси гәрий кохен ройтерсниң зияритини қобул қилғанда хитай даирилириниң хитайда тиҗарәт қиливатқан америка ширкәтлирини өзиниң әқлий мүлүклирини тапшурушқа мәҗбурлаватқанлиқини билдүргән.

Президент трамп сөзидә "биз буниңға қарита наһайити қаттиқ җаза қоллинишни ойлишиватимиз. Мән буларни 30 январ күни америка дөләт мәҗлисидә оттуриға қойимән,"  дегән. Бирақ, у буниң тәпсилати үстидә тохталмиған.

Мәслиһәтчи кохенниң билдүрүшичә, нөвәттә бу мәсилә үстидә җиддий тәкшүрүш елип бериватқан тәкшүргүчиләр пат йеқинда өзиниң бу мәсилидики пикир-тәклиплирини америка һөкүмитигә сунидикән.

Хитай өткән йили мақуллиған "дөләт бихәтәрлик қануни" вә "интернет бихәтәрлики қануни" қатарлиқ бир қатар қанунларни пәш қилип туруп, чәтәл ширкәтлири вә мустәқил органлирини ширкәткә аит санлиқ мәлуматлар вә юқири техникилиқ учурлирини тапшурушқа қистиған. Бу әһвал хитайдики көплигән америка вә явропа ширкәтлирини нарази қилған. Америка ширкәтлириниң илгири сүрүшичә, хитай техника вә юмшақ детал оғрилиқи шундақла америка ширкәтлирини әқлий мүлүклирини тапшурушқа қисташ қатарлиқ усуллар арқилиқ америка ширкәтлиригә йүз милярд долларлиқ зиян салған.

Хитай ташқи ишлар министирлиқиниң баянатчиси лу каң пәйшәнбә күни мухбирларниң бу һәқтики соаллириға инкас қайтуруп, буниң хитай һөкүмити билән алақиси йоқлиғини, хитайниң әқлий мүлүк һоқуқиға һөрмәт қилидиғанлиқини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт