Donald tramp xitayning eqliy mülük oghriliqliridin hésab almaqchi bolghanliqini bildürdi

Muxbirimiz irade
2018-01-18
Élxet
Pikir
Share
Print

Amérika prézidénti donald tramp xitayning eqliy mülük oghriliqlirini qattiq jazalashni oylishiwatqanliqini bildürdi. Roytérs agéntliqining xewer qilishiche, charshenbe küni prézidént tramp we uning iqtisad meslihetchisi geriy koxén roytérsning ziyaritini qobul qilghanda xitay da'irilirining xitayda tijaret qiliwatqan amérika shirketlirini özining eqliy mülüklirini tapshurushqa mejburlawatqanliqini bildürgen.

Prézidént tramp sözide "Biz buninggha qarita nahayiti qattiq jaza qollinishni oylishiwatimiz. Men bularni 30 yanwar küni amérika dölet mejliside otturigha qoyimen,"  dégen. Biraq, u buning tepsilati üstide toxtalmighan.

Meslihetchi koxénning bildürüshiche, nöwette bu mesile üstide jiddiy tekshürüsh élip bériwatqan tekshürgüchiler pat yéqinda özining bu mesilidiki pikir-tekliplirini amérika hökümitige sunidiken.

Xitay ötken yili maqullighan "Dölet bixeterlik qanuni" we "Intérnét bixeterliki qanuni" qatarliq bir qatar qanunlarni pesh qilip turup, chet'el shirketliri we musteqil organlirini shirketke a'it sanliq melumatlar we yuqiri téxnikiliq uchurlirini tapshurushqa qistighan. Bu ehwal xitaydiki köpligen amérika we yawropa shirketlirini narazi qilghan. Amérika shirketlirining ilgiri sürüshiche, xitay téxnika we yumshaq détal oghriliqi shundaqla amérika shirketlirini eqliy mülüklirini tapshurushqa qistash qatarliq usullar arqiliq amérika shirketlirige yüz milyard dollarliq ziyan salghan.

Xitay tashqi ishlar ministirliqining bayanatchisi lu kang peyshenbe küni muxbirlarning bu heqtiki so'allirigha inkas qayturup, buning xitay hökümiti bilen alaqisi yoqlighini, xitayning eqliy mülük hoquqigha hörmet qilidighanliqini ilgiri sürgen.

Toluq bet