Америка дөләт хәвпсизлик мәслиһәтчиси җәйк сулливан билән хитай ташқи ишлар министири ваң йи баңкокта учришидикән

Вашингтондин мухбиримиз ирадә тәйярлиди
2024.01.26

Америка дөләт хәвпсизлик мәслиһәтчиси җәйк сулливан билән хитай ташқи ишлар министири ваң йиниң тайланд пайтәхти баңкокта көрүшидиғанлиқи мәлум. “вашингтон почтиси” гезитиниң дейишичә, икки тәрәпниң учришишиниң қайси вақитқа орунлаштурулғанлиқи ениқ елан қилинмиған, бирақ һәр икки әмәлдар бүгүн, йәни 26-январ баңкокқа йетип барған икән.

Америка дөләт хәвпсизлик кеңишиниң баянатчиси адриен ватсон (Adrienne Watson) бу һәқтики сөзидә, уларниң бу учришишиниң “президент байдин билән ши җинпиңниң 2023-йили ноябирдики водсайд башлиқлар йиғинида икки дөләтниң истратегийәлик алақисини сақлап қелиш вә мунасивәтләрни мәсулийәтчанлиқ билән идарә қилиш вәдисини гәвдиләндүридиғанлиқи” ни тәкитлигән.

Хитай ташқи ишлар министирлиқиниң баянатчиси ваң венбин, ваң йиниң сулливан билән көрүшүшни пиланлаватқанлиқини дәлиллигән. У мухбирларни күтүвелиш йиғинида ваң йиниң “хитайниң икки дөләт мунасивәтлири һәққидики мәйданини айдиңлаштуридиғанлиқини, тәйвән мәсилиси вә һәмдә америка билән өз-ара көңүл бөлидиған хәлқаралиқ вә район характерлик мәсилиләр тоғрисида пикир алмаштуридиғанлиқи” ни дегән.

“вашингтон почтиси” гезитиниң дейишичә, һәр икки дөләт көңүл бөлидиған җиддий мәсилә қизил деңиздики җиддийлик икән. Чүнки нурғун кемиләр сувәйиш қанилидин өтүштин һәзәр әйләватқанлиқтин бу вәзийәт хәлқаралиқ тиҗарәткә зор тәсир көрсәткән. Шуңа вашингтон бейҗиңниң иран билән болған йеқин мунасивитини қоллинип, қизил деңиздики киризисни бир тәрәп қилмақчикән.

Бу қетимлиқ учришишниң вақти хитайниң бир юқири дәриҗилик дипломатиниң шималий корейәни зиярәт қилишиниң арқисидинла орунлаштурулған. Бундин сирт, җәйк сулливан билән ваң йи һәр иккиси тайландтики мәзгилидә тайланд әмәлдарлири биләнму айрим-айрим көрүшидикән. Бу һәр икки дөләтниң тайландтики тәсирини ашуруш тиришчанлиқини көрситип беридикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.