Америка билән хитай баңкок учришишида қизил деңиз қатнишиниң һуҗумға учраш мәсилисидә келишәлмигән

Вашингтондин мухбиримиз әркин тәйярлиди
2024.01.29

Америка дөләт хәвпсизлик баш мәслиһәтчиси җәк солливан билән хитай ташқи ишла министири ваң йиниң 26 вә 27-январ күнлири тайланд пайтәхти баңкоктики учришишида, тәрәпләр қизил деңиз қатнишиниң һуҗумға учраш мәсилисидә келишәлмигән.

“политико” йәни “сиясәт” гезитиниң хәвәр қилишичә, бир америка һөкүмәт әмәлдари икки күнлүк сөһбәттә америка тәрәп йәмәнлик хуси һәрикәтчилириниң қизил деңизда сода парахотлириға һуҗум қилишини тохтитиши үчүн хитайниң иранға бесим ишлитишини қолға кәлтүрүштә мувәппәқ болалмиғанлиқини ейтқан. Сөһбәттә җәк солливан американиң әндишилирини оттуриға қойған болсиму, лекин хитай тәрәп йәмәнлик хусиларни қоллаватқан иранға күчлүк иқтисадий бесим ишлитидиғанлиқиға һечқандақ бешарәттә болмиған. Хитай илгири йәршари тәминләш зәнҗиригә тәһдит селиватқан йәмәнлик хусиларниң һәрикитини тәнқид қилған болсиму, әмма униң хусиларниң арқисидики асаслиқ күч болған иранға бесим ишлитишидин қечиши диққәт қозғимақта.

“сиясәт” гезитиниң ейтишичә, юқири дәриҗилик бир америка әмәлдари 27-январ мухбирларға, сөһбәттә “бейҗиңниң бу ишни иранға ейтқанлиқи” ни билдүргәнлики, әмма өзлириниң “бу ишқа уларниң бу мәсилини қанчилик әмили рәвиштә оттуриға қойғанлиқиға қарап баһа беридиғанлиқи” ни ейтқан. юқири дәриҗилик америка әмәлдари, “икки күнлүк сөһбәттә…. Бизниң әмили мәсилиләргә чоңқурлап кириш, мунасивәтләрниң йөнилиши, икки дөләт дуч кәлгән ачқучлуқ мәсилиләрдә истратегийәлик вә чоңқур музакириләрни елип бериш мүмкинчиликимиз болди” дегән. Лекин хитай тәрәпниң сөһбәт һәққидики баянатида тәйвән мәсилисиниң муһим нуқта сүпитидә алаһидә тилға елиниши,

Америка тәрәпниң украина уруши, оттура-шәрқ, шималий корейә, җәнубий деңиз вә бирма мәсилилирини өз ичигә алған “йәр шари вә район характерлик мәсилиләр” ни алаһидә тилға елиши диққәт қозғимақта. Мәлум болушичә, икки тәрәп җов байден билән ши җинпиң оттурисидики “даимлиқ алақә” ни давамлаштурушқа вә хусусән иккийләнниң “келәрки айларниң биридә” телефон сөһбити ‍өткүзүшигә келишкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.