Хитай сақчилири американиң 7 ширкитигә бастуруп кирип, хизмәтчилирини җасус дәп қолға алған

Вашингтондин мухбиримиз җәвлан тәйярлиди
2024.02.28

Хитай даирилири өткән йил американиң бейҗиңдики 7 ширкитигә туюқсиз бастуруп кирип, ширкәтниң бәзи хизмәтчилирини “җасуслуқ” билән әйибләп қолға алған. Американиң хитайда турушлуқ баш әлчиси никулас бурнис (Nicholas Burns) 25-феврал күни америка “коломбийә радийоси” (CBS) ға бәргән зияритидә буни ашкарилиған.

Әнгилийә “күндилик почта” (Daily Mail) гезити 26-феврал күни елан қилған бу хәвәрдә ейтилишичә, никулас бурнис хитайниң бир яқтин чәт әл мәблиғини җәлп қиливатсиму, йәнә бир бир яқтин чәт әл карханилириға зәрбә бериватқанлиқини, шу қатарда америка ширкәтлириниңму зәрбигә учриғанлиқини ейтқан. У мундақ дегән: “хитай һөкүмити америка билән японийә ширкәтлириниң хитайда тиҗарәт қилишини қоллайдиғанлиқини билдүрсиму, өткән йил 3-айдин башлап 7 америка ширкитигә туюқсиз бастуруп кирип, уларни тақап қойди һәмдә интайин қамлашмиған әйибләшләрни оттуриға қойди”.

Хитай һөкүмитиниң илгири бир нәччә америка ширкәтлиригә мудахилә йүргүзгәнлики һәққидә хәвәрләр чиққан болсиму, никулас бурнис ашкарилиған бу сан алаһидә көп икән.

Хәвәрдә көрситилишичә, хитай 2023-йил 7-айдин башлап, “җасуслуққа қарши туруш қануни” ни күчәйткән болуп, “хитайниң дөләт хәвпсизликигә зиян йәткүзидиған һәр қандақ учурни чәкләш” дегән маддини қошуп, җасуслуққа қарши һәрикәтниң ениқлимисини кеңәйткән. Буниңдин америка вә башқа ғәрб дөләтлири ширкәтлири ғайәт зор бесим вә тәһдиткә учриған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.