Amérika maliye ministirliqi: “Yigirme dölet yighinida xitaygha qarshi terepdar toplimaqchimiz”

Muxbirimiz shöhret hoshur
2018.03.16

Melum bolushiche, kéler hepte argéntinada échilidighan “20 Dölet yighini” da amérika terep xitayning erkin bazar buzghunchiliqigha qarshi özige terepdar toplimaqchi iken.

Amérika maliye ministirliqining ministiri stéwin mnuchin bügün bu heqte muxbirlargha qilghan sözide amérikining hazirghiche yawropa birliki we bashqa alaqidar döletler bilen sözlishish arqiliq xitayning dölet igilikidiki karxaniliri we chet'elge meblegh sélish siyasitining iqtisadiy muqimliq we bixeterlikke tehdit ikenliki heqqide asasen pikir birlikige kelgenlikini ilgiri sürgen.

U, bu qétimqi yighinda mushu nuqtida dawamliq sözlishidighanliqi we xitaygha qarshi tedbir élish üchün terepdar toplaydighanliqini ashkarilighan.

Yillardin béri xelq'ara xewerlerde déyilishiche, xitayning mehsulat ishlepchiqirishta dölet ichide süpet ötkilini ching tutmasliqi, dölet sirtida özlirining parixorluq istilini bashqilargha yuqturushi we pul qimmitini erkin bazar riqabitige namuwapiq shekilde kontrol qilishi qatarliq sewebler tüpeylidin dunya soda bazirida nep qazinip kelgen.

Xitay keltürüp chiqarghan bu mesililerning bir qismini dunya soda teshkilati jaza tedbirliri arqiliq bir terep qilip kéliwatqan bolsimu, köp qismi sodida süpet we exlaqqa étibar bergen döletlerni ziyan'gha uchritip kéliwatqan idi.

Roytérs agéntliqining bügünki xewiride bayan qilinishiche, amérika maliye ministiri bügünki sözide dunyaning nöwette mewjut mesilisini tonup yetkenliki we shunga özining bu mesilide özige terepdar topliyalaydighanliqigha qarita ishenchini ipadiligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.