Америка вә хитай һөкүмәтлириниң баянатчилири «сөз уруши» қилди

Мухбиримиз әзиз
2020-03-24
Елхәт
Пикир
Share
Принт

Хитай билән америка оттурисида таҗсиман вирусниң мәнбәси вә нами һәққидики талаш-тартишниң чоңқурлишишиға әгишип, икки тәрәп һөкүмәтлириниң аял баянатчилири бир мәйдан «сөз уруши» қозғиди.

«Сода дуняси» гезитиниң 23-марттики хәвиридә ейтилишичә, америка һөкүмитиниң баянатчиси морган ортагус ханим хитай тәрәпниң вирус һәққидики учурларни йошуруп, ташқи дуняни бихудлаштурғанлиқини әйиблиди һәмдә «3-январда хитай һөкүмити вирус әвришкилирини йоқитип, вухәндики дохтурларниң зуванини өчүрүп болди,» деди.

Хитай һөкүмитиниң баянатчиси хуа чүнйиң болса өзлириниң вирус һәққидә аллиқачан америка һөкүмитигә мәлумат бәргәнликини тәкитләп: «ялғанчилиқ қилиш бәдилигә америка улуғ мәмликәт болуп қалмайду,» деди.

Икки тәрәп оттурисидики тивиттер бәтлиридә әвҗ алған «сөз уруш» ида муһим нуқта хитайниң вирус тарқилишқа башлиғанда бу әһвални дунядин йошуруши һәққидә болди. Таҗсиман вируси дуняви вабаға айлинип, хәлқиаләмниң ғәзәп-нәприти хитайға бурулғанда хитай һөкүмити андин вухәндики вирус һәққидә әң дәсләп мәлумат бәргән дохтурларниң «үнини өчүргән», сақчиларни «бир яқлиқ қилған.»

Америка президенти доналд трамп бу вирусни «хитай вируси» дәп атиғандин кейин йәнә көп қетим баянат берип: «хитай һөкүмити бу вирус һәққидә балдуррақ бизни хәвәрләндүрүп қойған болса яхши болар иди,» деди.

Йеқинда америка дөләт мәҗлисиниң бир қисим әзалири тивиттерниң баш директориға мәктуп йоллап: «ялғанчилиқ арқилиқ тәшвиқат уруши қиливатқан хитай компартийәси вә һөкүмити хадимлириниң тивиттер һесабатлирини мәңгүлүккә тақиветиш» ни тәләп қилди.

Пикирләр (0)
Share
Толуқ бәт