Amérika we xitay hökümetlirining bayanatchiliri "Söz urushi" qildi

Muxbirimiz eziz
2020-03-24
Élxet
Pikir
Share
Print

Xitay bilen amérika otturisida tajsiman wirusning menbesi we nami heqqidiki talash-tartishning chongqurlishishigha egiship, ikki terep hökümetlirining ayal bayanatchiliri bir meydan "Söz urushi" qozghidi.

"Soda dunyasi" gézitining 23-marttiki xewiride éytilishiche, amérika hökümitining bayanatchisi morgan ortagus xanim xitay terepning wirus heqqidiki uchurlarni yoshurup, tashqi dunyani bixudlashturghanliqini eyiblidi hemde "3-Yanwarda xitay hökümiti wirus ewrishkilirini yoqitip, wuxendiki doxturlarning zuwanini öchürüp boldi," dédi.

Xitay hökümitining bayanatchisi xu'a chünying bolsa özlirining wirus heqqide alliqachan amérika hökümitige melumat bergenlikini tekitlep: "Yalghanchiliq qilish bedilige amérika ulugh memliket bolup qalmaydu," dédi.

Ikki terep otturisidiki tiwittér betliride ewj alghan "Söz urush" ida muhim nuqta xitayning wirus tarqilishqa bashlighanda bu ehwalni dunyadin yoshurushi heqqide boldi. Tajsiman wirusi dunyawi wabagha aylinip, xelqi'alemning ghezep-nepriti xitaygha burulghanda xitay hökümiti andin wuxendiki wirus heqqide eng deslep melumat bergen doxturlarning "Ünini öchürgen", saqchilarni "Bir yaqliq qilghan."

Amérika prézidénti donald tramp bu wirusni "Xitay wirusi" dep atighandin kéyin yene köp qétim bayanat bérip: "Xitay hökümiti bu wirus heqqide baldurraq bizni xewerlendürüp qoyghan bolsa yaxshi bolar idi," dédi.

Yéqinda amérika dölet mejlisining bir qisim ezaliri tiwittérning bash diréktorigha mektup yollap: "Yalghanchiliq arqiliq teshwiqat urushi qiliwatqan xitay kompartiyesi we hökümiti xadimlirining tiwittér hésabatlirini menggülükke taqiwétish" ni telep qildi.

Toluq bet