Америка кеңәш палата әзаси варен: америка хитайниң америкини суйиистемал қилишидин ойғанди

Мухбиримиз әркин
2018-04-02
Share

Америка кеңәш палатасиниң нопузлуқ әзаси елзабет варен, америкиниң йиллардин бери хитайға қарита хата сиясәт йүргүзүп кәлгәнликини, бирақ һазир америкиниң хитайниң америкини суйиистемал қилишидин ойғанғанлиқини билдүргән.

Ройтерс агентлиқиниң хәвәр қилишичә, елзабет ханим бу сөзләрни шәнбә күни хитайда мухбирларға тәкитлигән. У, өткән җүмә күнидин башлап хитайда зиярәттә болған.

Елзабет варен 3 күнлүк зияритидә хитайниң муавин баш министири лю хе, дипломатийә ишлириға мәсул дөләт комиссари яң җйечи вә дөләт мудапиә министири вей феңхе қатарлиқ шәхсләр билән учришип, шималий кореийә мәсилиси, икки дөләтниң сода ихтилапи қатарлиқ мәсилиләрни музакирә қилған.

Ройтерсниң хәвәр қилишичә, елизабет варен хитай әмәлдарлириға йәнә: "әгәр у кишилик һоқуққа һөрмәт қилмиса, америка хәлқиниң хитай билән техиму кәң иқтисади һәмкарлиқ елип беришни қоллимайдиғанлиқи" ни билдүргән.

У, узун йиллардин бери хитай билән иқтисади һәмкарлиқ күчәйсә, бу униң техиму кәң ечиветилишигә түрткә болиду, дегән хата тонуш дәвамлаштурулуп келингәнлики, бирақ һазир америка һөкүмитиниң ойғанғанлиқини тәкитләп, "пүтүн сиясәт хата йолға башланди. Биз пакитқа уйғун болмиған һекайиләр билән өзимизни хушал қилип кәлдуқ" дегән.

Елзабет варен президент трампни әң қаттиқ тәнқид қилип келиватқан кеңәш палата әзалириниң бири. Лекин шәнбә күни мухбирларға трамп һөкүмитиниң хитай мәһсулатлириға баҗ қойғанлиқидин әндишә қилмайдиғанлиқини билдүргән.

Елзабет варенниң зиярити президент трамп хитайниң 60 милярд долларлиқ експорт мәһсулатиға баҗ қоюп, униң америка әқлий мүлүк һоқуқини системилиқ суйиистемал қиливатқанлиқини җазалиған мәзгилдә елип берилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт