Алекс воң: «трамп һөкүмитиниң йеңи истратегийәси хитайға қарита бир чоң агаһландуруштур»

Мухбиримиз шөһрәт һошур
2018-04-04
Елхәт
Пикир
Share
Принт

Америкиниң шәрқи асия вә тинч окян ишлириға мәсул муавин ташқи ишлар министири алекс воң, дүшәнбә күнидики ахбарат елан йиғинида трамп һөкүмитиниң «әркин вә ечиветилгән һинди-тинч окян истратегийәси» намидики пилани һәққидә чүшәндүрүш бәргән.

«Ички тиҗарәтчи журнили» ниң хәвәр қилишичә, алекс воң сөзидә хитайни һеч тилға алмиған болсиму, лекин баштин-ахир хитайни агаһландурған вә мәзкур райондики дөләтләрни һәқ-һоқуқлирида чиң турушқа илһамландурған. Алекс воң мундақ дегән: «дуня деңиз вә һава йоли тиҗаритиниң 50 пирсәнти һинди окян билән тинч окян тәвәликидә, җүмлидин җәнуби хитай деңизи тәвәликидә давам қилиду. Шуңа деңиз вә һава йоллири мәзкур районниң җан томури, бу томур очуқ вә әркин болуши керәк.»

Алекс воң йәнә тәвәликтики дөләтләрниң игилик һоқуқиниң мустәһкәм болуши вә бесимдин хали болуши керәкликини әскәртип, хитайниң райондики тәсир күчигә вә территорийә талаш-тартишлириға ишарәт қилған. Хәвәрдә дейилишичә, алекис воң йәнә хитайниң иқтисадий күчини хата қоллиниватқанлиқиға ишарәт қилип, дөләтләрниң башқиларға ярдәм бәргәндә уларни беқиндуруш яки боюн әгдүрүш үчүн әмәс, бәлки шу дөләт хәлқиниң турмуш сәвийәсини йүксәлдүрүшни мәқсәт қилиши керәкликини тәкитлигән.

Алекс воң дүшәнбә күнидики бу ахбарат елан қилиш йиғинида һиндистанға мәдһийә оқуған вә һиндистанниң демократик түзүми арқилиқ очуқ вә әркин хәлқара содида йетәкчилик рол ойниялайдиғанлиқини тилға алған. Мәзкур хәвәрдә йәнә трамп һөкүмитиниң америка ташқи сияситини асияға мәркәзләштүргәнлики, шимали корейә мәсилисидики тәрәққият, хитайға қарита қоллиниватқан чегра беҗи қоюш тәдбири вә икки йилдин буян тинч окянда америка деңиз армийә маневириниң көпәйгәнлики қатарлиқ пакитлар билән көрситилгән.

Пикирләр (0)
Share
Толуқ бәт