Aléks wong: "Tramp hökümitining yéngi istratégiyesi xitaygha qarita bir chong agahlandurushtur"

Muxbirimiz shöhret hoshur
2018-04-04
Élxet
Pikir
Share
Print

Amérikining sherqi asiya we tinch okyan ishlirigha mes'ul mu'awin tashqi ishlar ministiri aléks wong, düshenbe künidiki axbarat élan yighinida tramp hökümitining "Erkin we échiwétilgen hindi-tinch okyan istratégiyesi" namidiki pilani heqqide chüshendürüsh bergen.

"Ichki tijaretchi zhurnili" ning xewer qilishiche, aléks wong sözide xitayni héch tilgha almighan bolsimu, lékin bashtin-axir xitayni agahlandurghan we mezkur rayondiki döletlerni heq-hoquqlirida ching turushqa ilhamlandurghan. Aléks wong mundaq dégen: "Dunya déngiz we hawa yoli tijaritining 50 pirsenti hindi okyan bilen tinch okyan tewelikide, jümlidin jenubi xitay déngizi tewelikide dawam qilidu. Shunga déngiz we hawa yolliri mezkur rayonning jan tomuri, bu tomur ochuq we erkin bolushi kérek."

Aléks wong yene teweliktiki döletlerning igilik hoquqining mustehkem bolushi we bésimdin xali bolushi kéreklikini eskertip, xitayning rayondiki tesir küchige we térritoriye talash-tartishlirigha isharet qilghan. Xewerde déyilishiche, alékis wong yene xitayning iqtisadiy küchini xata qolliniwatqanliqigha isharet qilip, döletlerning bashqilargha yardem bergende ularni béqindurush yaki boyun egdürüsh üchün emes, belki shu dölet xelqining turmush sewiyesini yükseldürüshni meqset qilishi kéreklikini tekitligen.

Aléks wong düshenbe künidiki bu axbarat élan qilish yighinida hindistan'gha medhiye oqughan we hindistanning démokratik tüzümi arqiliq ochuq we erkin xelq'ara sodida yétekchilik rol oyniyalaydighanliqini tilgha alghan. Mezkur xewerde yene tramp hökümitining amérika tashqi siyasitini asiyagha merkezleshtürgenliki, shimali koréye mesilisidiki tereqqiyat, xitaygha qarita qolliniwatqan chégra béji qoyush tedbiri we ikki yildin buyan tinch okyanda amérika déngiz armiye manéwirining köpeygenliki qatarliq pakitlar bilen körsitilgen.

Toluq bet