Трамп һөкүмити америка федератсийә пенсийә записини хитайдин қайтуруп келидиғанлиқини билдүрди

Мухбиримиз әзиз
2020-05-12
Share

Хитай һөкүмитиниң таҗсиман вируси мәсилисидики җавабкарлиқини сүрүштә қилиш һәққидә кәскин муназириләр қанат йейиватқанда америка президенти доналд трамп өткән мәзгилләрдин буян хитайдики пай чеки базириға селинип оборот қилиниватқан федератсийә пенсийә записини қайтуруп келидиғанлиқини билдүрди.

Ройтерс агентлиқиниң 12-майдики хәвиридә ейтилишичә, ақ сарай бу қетим тохтатмақчи болған сомма 50 милярд америка доллиридин ашидикән. Бу мәбләғниң васитилик һалда хитай армийәсини һәрбий айропиланлар билән тәмин етидиған «хитай авиатсийә санаити гуруһи» вә назарәт механизимида авангартлиқ ролини ойнаватқан Hikvision рәқәмлик технологийә ширкитигә охшаш ширкәтләрни иқтисадий йөләккә игә қилип қоюши президент доналд трампниң бу қарарни чиқиришиға сәвәб болған асаслиқ амиллар икән.

«Фокус хәвәрлири» ниң 12-майдики алаһидә хәвиридә ейтилишичә, бир күн илгири ақ сарайниң дөләт бихәтәрлики мәслиһәтчиси роберт брйен вә иқтисад мәслиһәтчиси ларрий кудлов америка әмгәк министирлиқиниң министири юҗин скалияға мәхсус бу һәқтә мәктуп йоллиған. Мәктупта улар америка федератсийә пенсийә записини хитай пай чеки базирида обурутқа селишниң американиң дөләт бихәтәрлики үчүн зиянлиқ икәнликини, йәнә келип буниң васитилик һалда хитай һөкүмитиниң аз санлиқ милләтләргә қаратқан кишилик һоқуқ дәпсәндичилик қилмишиға иқтисадий җәһәттин ярдәм бәргәнлик болуп қалидиғанлиқини алаһидә тәкитлигән. Мәктупта ениқ қилип «хитайдики бу мәбләғдин пайдилиниватқан ширкәтләр америка һөкүмитиниң җаза бериш тизимликидә болуп, дәл мушулар хитай һөкүмитиниң һәрбий қуввитини ашурушқа вә һәрқайси диний җамаәтни бастурушқа ярдәм бериватқанлардур» дейилиду. Министир юҗин скаля буниңға тездин инкас қайтуруп, өзиниң бу тәклипни қәтий қобул қилиш мәйданини ипадилигән.

«Ню-йорк вақти» гезитиниң 12-майдики хәвиридә ейтилишичә, америка сиясий саһәсидики көплигән затлар бу қарарни қизғин алқишлайдиғанлиқини билдүргән. Шундақла буниң таҗсиман вируси сәвәблик америка-хитай мунасивити йириклишиватқан һәмдә икки тәрәп оттурисидики сода келишиминиң биринчи басқучи иҗра болуш алдида туруватқан пәвқуладдә пәйттә америка ташқи сияситидә зор бир бурулушниң барлиққа келишидики муһим амиллардин болуп қалидиғанлиқини алаһидә тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.