Tramp hökümiti amérika fédératsiye pénsiye zapisini xitaydin qayturup kélidighanliqini bildürdi

Muxbirimiz eziz
2020-05-12
Share

Xitay hökümitining tajsiman wirusi mesilisidiki jawabkarliqini sürüshte qilish heqqide keskin munaziriler qanat yéyiwatqanda amérika prézidénti donald tramp ötken mezgillerdin buyan xitaydiki pay chéki bazirigha sélinip oborot qiliniwatqan fédératsiye pénsiye zapisini qayturup kélidighanliqini bildürdi.

Roytérs agéntliqining 12-maydiki xewiride éytilishiche, aq saray bu qétim toxtatmaqchi bolghan somma 50 milyard amérika dolliridin ashidiken. Bu mebleghning wasitilik halda xitay armiyesini herbiy ayropilanlar bilen temin étidighan "Xitay awi'atsiye sana'iti guruhi" we nazaret méxanizimida awan'gartliq rolini oynawatqan Hikvision reqemlik téxnologiye shirkitige oxshash shirketlerni iqtisadiy yölekke ige qilip qoyushi prézidént donald trampning bu qararni chiqirishigha seweb bolghan asasliq amillar iken.

"Fokus xewerliri" ning 12-maydiki alahide xewiride éytilishiche, bir kün ilgiri aq sarayning dölet bixeterliki meslihetchisi robért bryén we iqtisad meslihetchisi larriy kudlow amérika emgek ministirliqining ministiri yujin skaliyagha mexsus bu heqte mektup yollighan. Mektupta ular amérika fédératsiye pénsiye zapisini xitay pay chéki bazirida oburutqa sélishning amérikaning dölet bixeterliki üchün ziyanliq ikenlikini, yene kélip buning wasitilik halda xitay hökümitining az sanliq milletlerge qaratqan kishilik hoquq depsendichilik qilmishigha iqtisadiy jehettin yardem bergenlik bolup qalidighanliqini alahide tekitligen. Mektupta éniq qilip "Xitaydiki bu mebleghdin paydiliniwatqan shirketler amérika hökümitining jaza bérish tizimlikide bolup, del mushular xitay hökümitining herbiy quwwitini ashurushqa we herqaysi diniy jama'etni basturushqa yardem bériwatqanlardur" déyilidu. Ministir yujin skalya buninggha tézdin inkas qayturup, özining bu teklipni qet'iy qobul qilish meydanini ipadiligen.

"Nyu-york waqti" gézitining 12-maydiki xewiride éytilishiche, amérika siyasiy sahesidiki köpligen zatlar bu qararni qizghin alqishlaydighanliqini bildürgen. Shundaqla buning tajsiman wirusi seweblik amérika-xitay munasiwiti yiriklishiwatqan hemde ikki terep otturisidiki soda kélishimining birinchi basquchi ijra bolush aldida turuwatqan pewqul'adde peytte amérika tashqi siyasitide zor bir burulushning barliqqa kélishidiki muhim amillardin bolup qalidighanliqini alahide tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.