Америка хитайдики завут-карханиларни хитайдин чекинишкә чақирди

Мухбиримиз әзиз
2020-05-20
Елхәт
Пикир
Share
Принт

Америка президенти доналд трамп һакимийәт бешиға чиққандин буян чәтәлләрдики америка ширкәтлири вә карханилирини америкаға қайтип келишкә дәвәт қилип келиватқаниди. Бу қетимқи таҗсиман вируси дуняви вабаға айлинип кәткәндин кейин бу чақириқ йәнә бир қетим оттуриға чиқишқа башлиди.

«Германийә долқунлири» радийосиниң 20-майдики хәвиридә ейтилишичә, нөвәттә америка һөкүмитидики юқири дәриҗилик әмәлдарлар баҗ кәчүрүм қилиш, мунасивәтлик йеңи бәлгилимиләрни түзүп чиқиш, зөрүр болған иқтисадий толуқлима ярдими билән тәминләш қатарлиқ чарилар билән хитайдики америка завут-карханилирини америкаға қайтуруп келишни җиддий музакирә қилмақтикән.

Болупму мушу қетимқи вирус апитидә американиң көплигән теббий буюмлар тәминатида өз-өзини қамдиялмаслиқи, буниң болса биваситә һалда нурғунлиған кишиләрниң биһудә өлүп кетишигә сәвәб болуши түпәйлидин бу һәқтики чуқанлар техиму юқири пәллигә чиқмақтикән. Америка президенти доналд трампму өзиниң тиветтер бетидә учур йоллап «һазир хитайдики бәзи сараңлар нәччә йүз миңлиған кишиниң җениға замин болған вирус үчүн ташқи дуняни әйибләп баянат елан қилғили турди. Бу калваларға шуни чүшәндүрүп қоюңлар: бу қетимқи дуняви қатиллиқ пәқәт ‹хитайниң қабилийәтсизлики'дин башқа нәрсә әмәс» дегән.

Америка авам палатасидики аз санлиқлар рәһбири кевин мәккартий бу хилдики тәдбирләрни изчил қоллап келиватқан кишиләрниң бири. У һазир америка һөкүмитидики икки партийә вәкиллириниң америка хәлқиниң җаниҗан мәнпәәти үчүн зич һәмкарлишиши һәққидә тохтилип «хитай билән болидиған муамилидә биз ‹демократлар истратегийәси' яки ‹җумһурийәтчиләр истратегийәси' дегәнләргә моһтаҗ әмәс. Бизгә лазими пәқәт ‹америка истратегийәси'дур» дегән. Шуниңдәк хитайдики тавар тәминат зәнҗирини америкиға қайтуруп келишниң һечқачанму һазирқидәк зөрүр болуп бақмиғанлиқини, ашу кархана вә завутларниң хитайдики мәшғулатлирини америка туприқида буниңдин кейин техиму асан вә техиму мукәммәл шәкилдә давамлаштуруш мумкинликини билдүргән.

Пикирләр (0)
Share
Толуқ бәт