Amérika xitay bilen rusiyening tehditige qarshi herbiy xam chotini zor miqdarda köpeytti

Muxbirimiz erkin
2018-05-25
Share

Amérika kéngesh palatasining herbiy ishlar komitéti peyshenbe küni yilliq herbiy xam chot qanun layihisini maqullap, 2019‏-yilliq herbiy xam chotini 716 milyard dollargha chiqarghan.

Roytérs agéntliqining xewiride qeyt qilinishiche, 2019‏-yilliq "Dölet mudapi'e hoquqi qanuni" amérikining ikki "Istratégiyelik riqabetchi" xitay bilen rusiyening tehditige taqabil turushni nishan qilghaniken.

Xewerde, mezkur xam chot layiheside soda qa'idilirige xilapliq qilishqa taqabil turush, dölet mudapi'e organlirining xu'awéy, jongshing shirketlirining mehsulatlirini ishlitishini cheklesh qatarliq tedbirlerni élishqa pul ajritilghanliqini bildürgen.

Mezkur xam chot layiheside yene xitay we rusiye bilen herbiy hemkarliq élip bérishqa bezi cheklimiler qoyulup, amérikining ittipaqdashliri we yawropadiki shérikliri bilen bolghan hemkarliqni kücheytish, rusiye we xitay bilen bolghan qoral-yaraq jehettiki perqni toluqlap, xitay we rusiyening tehditige qarshi qoghdinishni kücheytish otturigha qoyulghan.

Mezkur qanun layiheside yene tor hujumigha qarshi qayturma zerbe bérish, tor hujumigha zerbe bérishte amérika "Dölet küchining barliq qoralliri" ni ishqa sélip, qarshi terepke taqabil turush tekitlen'gen.

Kéngesh palatasi mezkur qanunni maqullashtin sel awwal awam palatasi özining xam chot qanun layihisini maqullighan idi. Her ikki qanun layihesi kéngesh we awam palatalirida maqullan'ghandin kéyin birleshtürülüp prézidéntning testiqigha yollinidu.

Roytérsning agéntliqining bildürüshiche, mezkur qanun layihesining resmiy qanun'gha aylinishi üchün birqanche ay waqit kétidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet