Америка вә хитай хоңкоң мәсилисидә йәнә тиркишип қалди

Мухбиримиз ирадә
2020.05.26

Хитайниң хоңкоңға алақидар дөләт хәвпсизлики қануни мақуллимақчи болуши хәлқарада күчлүк тәнқидкә учримақта. Йеқинда, америка ақсарайниң дөләт бихәтәрлик мәслиһәтчиси роберт обрайин хитайни агаһландуруп: әгәр хитай хоңкоңға алақидар дөләт бихәтәрлик қанунидин ваз кәчмигән тәқдирдә, америка хоңкоңға бериватқан әвзәл сода шараитлиридин ваз кечиду, дегән иди.

Хитай ташқи ишлар министирлиқиниң баянатчиси җав лиҗйән 25-май дүшәнбә күни америкаға тәһдит қилип, “әгәр америка хитайниң мәнпәәтигә зиян йәткүзүштә чиң турса бизму буниңға қарши һәрикәткә өтимиз,” дегән.

Хитайниң йеңи бихәтәрлик қануни хоңкоңда изчил давам қилип келиватқан намайишлардин кейин оттуриға чиққан болуп, нурғун көзәткүчиләр униң хоңкоңдики демократик һәрикәтләргә зәрбә беришни нишан қилғанлиқини билдүрмәктә. Миңлиған хоңкоңлуқлар йәкшәнбә күни таҗсиман вирусқа қарши туруш үчүн йолға қоюлған чәклимиләргә қаримай, кочиларға чиқип намайиш қилиш арқилиқ хитайниң бу қанун лайиһәсигә наразилиқини ипадилиди.

Көзәткүчиләр болса ғәрб демократик әллириниң хоңкоң мәсилисигә һәргиз сәл қаримаслиқи керәкликини агаһландурмақта.

Әнглийәниң хоңкоңдики әң ахирқи валийси болған кирис пәттин 24-май күни “малийә вақти” гезитигә мақалә елан қилип, хитайниң хоңкоң демократийәсигә қиливатқан бу һуҗуминиң пүтүн дуня көңүл бөлүшкә тегишлик мәсилә икәнликини тәкитлиди. У мақалисидә, һазирғичә дунядики 23 дөләттин болған 200 дин артуқ сиясәтчи вә юқири дәриҗилик әмәлдарниң бейҗиңниң һәрикитини әйибләйдиған бир баянатқа қол қойғанлиқини баян қилиши билән биргә, әнглийәниң чоқум бу мәсилини келәр айда ечилидиған G7 Дөләтлири йиғининиң күн тәртипигә әп келиши керәкликини әскәрткән.

У мақалисидә, уйғурлар мәсилисиниму тилға елип, уйғур елидики пуқраларни лагерларға солиған ши җинпиңниң әмдики зәрбә бериш нишаниниң хоңкоңлуқлар болуватқанлиқини тәкитлигән вә бу мәсилигә пүтүн дуняни диққәт қилишқа чақирған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.