Amérika we xitay xongkong mesiliside yene tirkiship qaldi

Muxbirimiz irade
2020-05-26
Élxet
Pikir
Share
Print

Xitayning xongkonggha alaqidar dölet xewpsizliki qanuni maqullimaqchi bolushi xelq'arada küchlük tenqidke uchrimaqta. Yéqinda, amérika aqsarayning dölet bixeterlik meslihetchisi robért obrayin xitayni agahlandurup: eger xitay xongkonggha alaqidar dölet bixeterlik qanunidin waz kechmigen teqdirde, amérika xongkonggha bériwatqan ewzel soda shara'itliridin waz kéchidu, dégen idi.

Xitay tashqi ishlar ministirliqining bayanatchisi jaw lijyen 25-may düshenbe küni amérikagha tehdit qilip, "Eger amérika xitayning menpe'etige ziyan yetküzüshte ching tursa bizmu buninggha qarshi heriketke ötimiz," dégen.

Xitayning yéngi bixeterlik qanuni xongkongda izchil dawam qilip kéliwatqan namayishlardin kéyin otturigha chiqqan bolup, nurghun közetküchiler uning xongkongdiki démokratik heriketlerge zerbe bérishni nishan qilghanliqini bildürmekte. Minglighan xongkongluqlar yekshenbe küni tajsiman wirusqa qarshi turush üchün yolgha qoyulghan cheklimilerge qarimay, kochilargha chiqip namayish qilish arqiliq xitayning bu qanun layihesige naraziliqini ipadilidi.

Közetküchiler bolsa gherb démokratik ellirining xongkong mesilisige hergiz sel qarimasliqi kéreklikini agahlandurmaqta.

En'gliyening xongkongdiki eng axirqi waliysi bolghan kiris pettin 24-may küni "Maliye waqti" gézitige maqale élan qilip, xitayning xongkong démokratiyesige qiliwatqan bu hujumining pütün dunya köngül bölüshke tégishlik mesile ikenlikini tekitlidi. U maqaliside, hazirghiche dunyadiki 23 dölettin bolghan 200 din artuq siyasetchi we yuqiri derijilik emeldarning béyjingning herikitini eyibleydighan bir bayanatqa qol qoyghanliqini bayan qilishi bilen birge, en'gliyening choqum bu mesilini kéler ayda échilidighan G7 Döletliri yighinining kün tertipige ep kélishi kéreklikini eskertken.

U maqaliside, Uyghurlar mesilisinimu tilgha élip, Uyghur élidiki puqralarni lagérlargha solighan shi jinpingning emdiki zerbe bérish nishanining xongkongluqlar boluwatqanliqini tekitligen we bu mesilige pütün dunyani diqqet qilishqa chaqirghan.

Toluq bet