Америка кеңәш палата әзалири хитайларниң америкада тәбиий пән саһәсидә оқушини чәкләш һәққидә қанун лайиһәси тонуштурди

Мухбиримиз ирадә
2020-05-28
Елхәт
Пикир
Share
Принт

Америка кеңәш палата әзалиридин том коттон вә марша билакбурн қатарлиқлар 27-май күни «бихәтәр алий мәктәп райони қануни» намлиқ бир қанун лайиһәсини тонуштурған. Бу қанун лайиһәси хитай оқуғучиларниң америкада STEM саһәси дәп билинидиған, йәни матиматика, енжинерлиқ вә пән-техника кәсиплиридә аспирантлиқта оқуши үчүн виза елишини чәкләйдикән.

Бу қанун лайиһәси бойичә йәнә америкалиқларниң хитайниң «миңлиған ихтисаслиқлар программиси» қатарлиқ чәтәллик ихтисас игилирини тәклип қилиш программилириға қатнишишиғиму чәклимә қоюлидикән.

Америка кеңәш палата әзаси том коттон өзиниң тор бетидә қилған сөзидә: «хитай коммунистик партийәси узундин буян америка университетлирини база қилип җасуслуқ қилди. Техиму чатақ йери шуки, хитай американиң қанунлиридики йочуқлардин пайдилинишқа урунуватиду. Әмди буниң ахирлишидиған вақти кәлди. ‹Бихәтәр алий мәктәп райони қануни' дөлитимизниң бихәтәрликини қоғдайду. Шундақла американиң илмий тәтқиқат саһәсини қоғдайду,» дегән.

Кеңәш палата әзаси марша билакбурн мундақ дегән: «бейҗиң оқуш вә тәтқиқат визисидин пайдилинип, америка илим-пән вә тәтқиқат органлириниң мәхпийәтликини оғрилаватиду. Хитайниң йеңилиқ яритиш роһидики кәмчилликлирини америка өзиниң әқил-парасити вә баҗ тапшурғучилириниң долларлири билән толдуруп бәрди. Әмди буниңға хатимә беридиған вақит кәлди.»

«Ню-йорк вақти гезити» 28-май елан қилған хәвиридә америка һөкүмитиниңму хитай армийәсигә четишлиқ америка университетлирида аспирантлиқта оқуватқан яки тәтқиқат билән шуғуллиниватқан хитай оқуғучиларниң визисини бикар қилишни ойлишиватқанлиқини хәвәр қилған иди.

Пикирләр (0)
Share
Толуқ бәт