Amérika xitayning tömürdin yasalghan alkan gazi baklirighimu tedbir qollanmaqchi

Amérika soda ministirliqi tünügün xitaydin import qilinidighan yene bir mehsulat - tömürdin yasilidighan alkan gazi baklirigha tedbir qollinidighanliqini élan qildi.

Firansiye axbarat agéntliqining bügünki bu heqtiki xewiride bayan qilinishiche, tramp hökümiti bu tedbirni amérikining oxayo we ténéssiy shtatliridiki karxanichilarning erz-shikayitige asasen oylashqan.

Déyilishiche, mezkur erzdar xitay shirketlirining alkan gazi baklirini döletning baj kechürüm qilish, qerz bérip turush qatarliq yölesh tedbirliri arqiliq mehsulat tennerqini amérikining oxshash tiptiki mehsulatliridin 55 pirsenttin 109pirsentke qeder töwen'ge chüshürgenliki we bu erzan, süpetsiz mallirini amérika bazirida tökme qilip satqanliqi, netijide amérika karxanilirining adaletsiz bir riqabetke duch kélip köp ziyan tartqanliqi shikayet qilin'ghan. Shikayette yene xitayning mushu xil yol bilen amérikigha 90 milyon dollarliq gaz silindiri satqanliqi eskertilgen.

Ilgiriki xelq'ara xewerlerde xitayning öz shirketlirining mehsulatlirigha qarita süpet ötkilini bosh tutush, ishchilarni sughurtisiz we töwen heq bilen ishlitishige köz yumush arqiliq mehsulat tennerqini töwen'ge chüshürgenliki we xelq'ara bazarda adaletsiz bir yosunda nep qazan'ghanliqi ilgiri sürülgen idi.

Roytérz agéntliqining bügünki xewiride déyilishiche, amérika soda ishliri mes'ulliridin téd mikney amérikining ötken heptilerdiki xitay bilen bolghan soda söhbitidin tesirat bayan qilip, xitay terepning söhbet dawamida san-sifirgha köp ésiliwalghanliqi, amérika terepning bolsa gepni qa'ide-tüzümge merkezleshtürgenlikini ashkarilighan. U buninggha asasen xitay bilen sodida kélishishning xéli uzun bir musape telep qilidighanliqini eskertken.