Җумһурийәтчиләр хитайға тақабил туруш үчүн истратегийә доклати тәйярлиған

Мухбиримиз җүмә
2020-06-14
Елхәт
Пикир
Share
Принт

Америка дөләт мәҗлисидики җумһурийәтчиләр «хитай компартийәсиниң американиң улини колаш, дуня тәртипини қайта түзүп чиқиш һәмдә ғәйрий шәкилдики һакимийәт әндизисини тәрғиб қилиш урунуши» ға тақабил туруш үчүн бир истратегийә доклати тәйярлиған.

120 Бәтлик мәзкур дөләт хәвпсизлики истратегийәси доклати америка дөләт мәҗлисиниң 147 нәпәр әзасини өз ичигә алған җумһурийәтчиләр тәтқиқат комитети тәрипидин 10-июн елан қилинған.

Доклатта хитай сиясий бюроси, хитай компартийәси мәркизий комитети әзалири вә хитай хәлқ қурултийиниң барлиқ вәкиллиригә ембарго қоюш тәклипи берилгән.

Доклатқа қариғанда бу чәклимиләр уларниң барлиқ аилә тавабиатлириға қаритилған болуп, әгәр шу бойичә болғанда, чәклимә қоюлған һөкүмәт әмәлдарлириниң пәрзәнтлириниң америкида оқушиму чәклинидикән.

Доклатта мундақ дейилгән: «хитай йеқини нәччә он йилидин бери һәрхил мәккарлиқларни ишлитип америка вә башқа ғәрб әллиригә тәвә әқлий мүлүкләрни оғрилиди. Шуни тәкитләш лазимки, хитай америкиға қариши иқтисадий җасуслуқ һәрикәтлири елип бериватқан шараитта хитай юқири дәриҗилик һөкүмәт әрбаблири вә уларниң аилә тавабиатлири америкида оқуялмаслиқи керәк.»

Доклатта йәнә, уйғур ели, тибәт вә хоңкоңда кишилик һоқуқ дәпсәндичилики билән шуғуллиниватқан һөкүмәт әрбаблириғиму ембарго қоюш тәклипи берилгән. 

Буларниң арисида хитай сиясий бюросиниң шинҗаң хизмитигә мәсул даимий әзаси ваң яң, уйғур аптоном райониниң партийә секретари чен чуәнго вә тибәт аптоном райониниң партком секретари хән җең қатарлиқлар алаһидә көзгә челиқиду.

Униңдин башқа америка дөләт мәҗлиси йеқинда «уйғур кишилик һоқуқ сиясити қануни» намлиқ бир кишилик һоқуқ қануни мақуллиған вә уни америка президентиниң имзалишиға йоллиған иди. 

Доклатта мундақ дейилгән: «хитай ғәйрий шәкилдики һакимийәт әндизисини һәдәп тәрғиб қиливатқан шараитта, америка қошма штатлири өзимизниң әркинлик, демократийә вә кишилик һоқуқ қиммәт қарашлиримизға хитай тәһдитигә тақабил туруш истратегийәмизниң муһим бир қисми сүпитидә техиму әһмийәт беришимиз керәк.»

Пикирләр (0)
Share
Толуқ бәт