Президент доналд трампниң дөләт бихәтәрлик мәслиһәтчиси «америка ахири хитайдин ибарәт бу тәһдитни тонуп йәтти» дегән

Мухбиримиз ирадә
2020-06-25
Елхәт
Пикир
Share
Принт

Америка президенти доналд трампниң дөләт бихәтәрлик мәслиһәтчиси роберт обрайин чаршәнбә күни қилған сөзидә, «америка ахири хитайдин ибарәт бу тәһдитни тонуп йәтти» дегән.

«Вашингтон почтиси» гезитиниң хәвиридин қариғанда, роберт обрайин чаршәнбә күни қилған бир сөзидә, «америка өзиниң яшаш усулиға хитай компартийәсиниң зор тәһдит икәнликини тонуп йәтти, у әмди бейҗиңниң идеологийәсиниң тарқилишини тәкшүрүш үчүн һәрикәт қилиду» дәп әскәрткән.

Роберт обрайин йәнә, хитай һәққидики бундақ сөзләрниң кәлгүси бир нәччә һәптә ичидә америка ташқи ишлар министири майк помпейо, баш тәптиши вилям барр вә федератсийә тәкшүрүш идарисиниң башлиқи кристофир врай қатарлиқ юқири дәриҗилик әмәлдарлар тәрипидинму тилға елинидиғанлиқини билдүргән.

Мәлум болушичә, роберт обрайин бу сөзләрни американиң аризона штатида бир гуруппа тиҗарәт лидерлири билән бир ариға йиғилғанда қилған. У бу йиғиндики сөзидә йәнә мундақ дегән: «американиң хитай хәлқ җумһурийитигә даир пассип вә садда күнлири әмди түгиди, америка президент трампниң рәһбәрликидә ахири хитай компартийәсиниң һәрикити пәйда қиливатқан тәһдитни вә уларниң бизниң гүзәл һаятимизға елип келидиған хәтирини тонуп йәтти».

У бу һәқтики сөзидә американиң хитайни демократийә йолиға маңиду, дегән иҗабий көз қараш билән йиллардин бери иқтисадий вә пән-техника җәһәттин зор дәриҗидә қоллап кәлгәнликини, бирақ ақивәттә буниң әксичә нәтиҗә бәргәнликини тәкитлигән.

Америка президенти доналд трампниң дөләт бихәтәрлик мәслиһәтчиси роберт обрайинниң юқиридики бу сөзлири америка-хитай мунасивәтлириниң тарихта көрүлмигән дәриҗидә чекингәнликиниң йәнә бир ярқин ипадиси, дәп қаралмақта.

Пикирләр (0)
Share
Толуқ бәт