Kéngesh palata ezasi rubi'o: amérika xitayning jenubiy déngizdiki herbiy eslihelirini weyran qilip tashlishi kérek

Amérika kéngesh palata ezasi, jumhuriyetchilerning sabiq prézidént namzati marko rubiyo, amérikining jenubiy déngizdiki igilik hoquqi talash-tartishtiki arallarda qurulghan xitay herbiy eslihelirini weyran qilip tashlishi kéreklikini bildürgen.

Uning körsitishiche, xitayning bu rayondiki hökümranliq tesirini yoqitish dunyaning mezkur eng muhim déngiz qatnash liniyesige kapaletlik qilishta nahayiti muhim ehmiyetke ige iken.

Marko rubiyo bu sözlerni ötken hepte “Washin'gton közetküchisi” namliq amérika tor zhurnilining ziyaritini qobul qilghanda tekitligen. U: “Eger ular bu rayonda bashqurulidighan bomba bazisi qurghan bolsa, biz uni weyran qilip tashlisaq bolidu. Chünki, bizning mezkur rayonda ularning mudapi'esidin atlap ötüp, uni weyran qilip tashlighudek herbiy küchimiz bar. Shu chaghdila biz uning bu rayondiki küchini yoqitalaymiz” dégen.

Kéngesh palata ezasi rubi'o bu sözlerni xitay mezkur rayondiki arallarda herbiy eslihelerni qurup, bu rayondiki döletler shundaqla amérikining menpe'etige jiddiy xiris qiliwatqan mezgilde qildi.

Xitay bu rayondiki herbiy eslihelirining déngiz bixeterlikini qoghdash, déngiz qatnishigha yardem qilish, izdesh we qutquzush ishlirigha qaritilghanliqini tekitlisimu, lékin amérika terep bu eslihelerning herbiy qorallar ikenlikini eskertip keldi.

Yéqinda amérika dölet mudapi'e ministiri jim mattis, xitayning “Bu rayon'gha orunlashturghan qoral-yaraq sistémisining bashqilarni qorqutush we zorlash meqsitidiki herbiy esliheler” ikenlikini tekitligen idi.