Rayan xas: “Amérika-xitay munasiwitini ‛soghuq urush‚ dep teswirlesh yéterlik emes!”

Amérika-xitay munasiwiti barghanséri yirikliship méngiwatqanda bir qisim analizchilar hemde mutexessisler bu halni “Yéngi soghuq munasiwetler urushining bashlinishi” dep teswirleshke bashlighanidi. Yéqinda washin'gton shehiridiki bruking inisti'utining tashqi munasiwet mesililiri boyiche aliy tetqiqatchisi rayan xas bu heqte pikir qilip؛ “Bu yéngi tereqqiyatni ‛soghuq munasiwetler urushi‚ dep atash bekmu cholta teswir bolup qalidu. Chünki bu teswir hazirqi ré'alliqning éghir weznini eks ettürüp bérelmeydu” dégen.

U bu heqtiki pikrini birleshme agéntliqning muxbirliri bilen söhbetleshkende alahide tekitligen. Birleshme agéntliqning 12-iyuldiki obzor maqaliside körsitilishiche, rayan xas özining bu heqtiki birqisim qarashlirini yéqinda neshrdin chiqqan kitabida mexsus tonushturghan hemde “Köpligen analizchilar xitayning küch-quwwitini ziyade chaghlawatidu, shundaqla uning nurghunlighan ajizliqlirini körmeywatidu” dep xulase chiqarghan. Söhbette muxbirlar uning mushundaq xulase chiqirishidiki seweblerni sorighanda rayan xas xitayning nöwette hemmila jehette krizisqa pétip qalghan bir weziyette ikenlikini, bolupmu dölet qerzining éship méngishi, nopustiki qériliq nisbitining yuqirilishi hemde mehsulat ishlepchiqirish iqtidarining töwenlep méngishi bekmu roshen boluwatqanliqini, hoquqning merkezge merkezlishishi barghanséri éghirlap méngiwatqanliqi üchün siyasiy sistémisining kalanpayliship kétiwatqanliqini, shuningdek xitayning amérika bilen ittipaqdashliq ornatqan döletler bilen bolghan munasiwitining buzulup xelq'ara ‍obrazining barghanséri xunüklishiwatqanliqini bayan qilghan. Uning bayan qilishiche, bularning hemmisi xitay döliti üchün zörür bolghan öz xelqini béqish hemde buningdin kéyinki tereqqiyati üchün kéreklik bolghan sana'et yéqilghusini import qilish ishlirigha éghir selbiy tesir körsetmektiken.

Rayan xas mushu ehwallarni omumlashturup؛ “Hazirqi ré'alliqni ‛soghuq munasiwetler urushi‚ dep teswirlesh yéterlik emes. Eyni waqitta sowét ittipaqi hökümranliq qilghan da'iride héchkim uninggha bir éghiz söz qilalmaytti. Halbuki bügünki xitayning etrapini bolsa xélila quwwetlik döletler orap turmaqta. Yene kélip bu tewelikte amérikamu kézip yürmekte” dégen.