Xitay amérika hökümitining Uyghur élidiki mejburiy emgekke qarshi alghan tedbirining xitay karxanilirigha ziyan salghanliqidin shikayet qilghan

Muxbirimiz irade
2020-07-14
Élxet
Pikir
Share
Print

Roytérs agéntliqining xewiridin qarighanda, xitay soda ministirliqi seyshenbe künidiki bir bayanatida amérika hökümitining amérika shirketlirini Uyghur élidiki tijariy pa'aliyetliri heqqide agahlandurushining yershari teminlesh zenjirlirini qalaymiqanlashturuwetkenlikini bildürgen.

Amérika hökümiti bu yil 7-ayning 1-küni "Shinjangdiki soda teminat zenjiri heqqide tewsiye" namliq höjjet élan qilip, xitay bilen soda qiliwatqan amérika shirketlirini Uyghur diyaridiki mejburiy emgekke chétishliq bolush éhtimali bolghan teminat zenjirliridin hoshyar bolushqa chaqirghan. Tewsiyenamide xitay hökümitining Uyghurlarni zor kölemde xitay ölkiliridiki zawutlargha ishchiliqqa yötkep, ishlepchiqirish séxlirigha emgekke orunlashturghanliqi, shu sewebtin amérikadiki soda shirketliri, ilmiy teshkilatlar, shexsler we meblegh salghuchilarning bu xil zulumlargha shérik bolup qalmasliqi üchün xitay shirketliri bilen soda qilishtin ilgiri ashu shirketning mehsulatlirining ishlepchiqirish jeryanini tekshürüp körüsh lazimliqini telep qilghanidi.

Roytérsning xewiride éytilishiche, qarar boyiche amérikaning zor kölemlik shirketliridin wolmart shirkiti, alma shirkiti we amazon tori qatarliq dangliq shirketlermu mejburiy emgekke munasiwetlik teminlesh zenjirliri bilen munasiwitini saqlap qélishning özlirige paydisiz ikenlikini bayqighan we netijide bu shirketlerni mal bilen teminlewatqan xitay teminlesh zenjirliride qalaymiqanlishish kep chiqqan.

Xitay soda ministirliqi "Amérikaning bu herikiti tajsiman wirustin chékin'gen yershari iqtisadini eslige keltürüshkimu ziyan yetküzdi", dep shikayet qilish bilen birge "Xitay zörür tedbirlerni qollinip, xitay karxanilirining qanuniy hoquqini qoghdaydu" dégen. Halbuki, amérika hökümitining Uyghurlarning mejburiy emgekke tutulushigha qarshi alghan yuqiridiki tedbiri kishilik hoquq organlirining küchlük qarshi élishigha érishkenidi.

Toluq bet