Xitayning ilghar mikro özek mashinisi sétiwélish pilani amérikaning tosqunluqigha uchrighan

Muxbirimiz jüme
2021-07-18
Share
Xitayning ilghar mikro özek mashinisi sétiwélish pilani amérikaning tosqunluqigha uchrighan Gollandiyening "Asml" namliq yuqiri pen-téxnika shirkitining bash shtabining aldigha ésilghan mezkur shirketning logosi. 2019-Yili 23-yanwar.
REUTERS

Amérika hökümiti gollandiyening ilghar mikro yérim ötküzgüch yasash mashinisining xitayning qoligha chüshüp ketmeslikini kapaletke ige qilghan.

Melum bolushiche, gollandiyening "ASML" namliq yuqiri pen-téxnika shirkiti dunya yérim ötküzgüch sana'‍itidiki ilghar mikro bir terep qilghuch yasashta kem bolsa bolmaydighan "Derijidin tashqiri ultra binepshe tash metbe'e sistémisi" dep atilidighan mashinini ishlepchiqiridighan birdinbir shirket iken.

180 Tonniliq bu mashina dunyagha dangliq "Intél" shirkiti koriyening "Samsung" éléktron shirkiti we "Alma" shirkitining mal teminligüchisi "Teywen yérim ötküzgüch ishlepchiqirish cheklik shirkiti" qatarliq shirketler teripidin ishlitilidiken.

"Wal strét zhurnili" ning xewer qilishiche, xitay hökümiti gollandiye da'irilirige bésim ishlitip, mezkur üskünini xitaygha sétip bérishke qistighan.

Xewerge qarighanda, xitay hökümiti "Xu'awéy" qatarliq xitay ichidiki özek ishlepchiqarghuchilarning bu jehette chet'el shirketlirige tayinip qélish tarixigha xatime bérish üchün bu üskünige érishini bekmu xalaydiken.

Emma, gollandiye amérikaning bésimi bilen xitaygha mikro yérim ötküzgüch yasash mashinisidin birnimu ewetmigen.

Xewerde körsitishiche, bu ishtin xewerdar bir amérika emeldarliri baydén hökümiti dölet bixeterliki endishisi seweblik gollandiye hökümitidin xitaygha bu üskünini sétishni chekleshni telep qilghan.

Bu üskünining istratégiyilik qimmitini eng deslep tramp hökümiti éniqlighan we gollandiye emeldarliri bilen alaqileshken iken.

Tramp we baydén hökümetliri xitayning "Xu'awéy" shirkiti qatarliq bir qisim yuqiri téxnika shirketlirini Uyghurlargha qaritilghan zulum xaraktérlik teqiblesh herikitidiki roli seweblik qara tizimlikke alghan we amérika shirketlirining mezkur shirketlerge ilghar üskünilerni sétip bérishi chekligen.

Washin'gton da'iriliri yene "Xu'awéygha" oxshash xitay shirketlirining jasusluq endishisi sewebidin, bashqa ittipaqdashlirini "Xu'awéy" üskünilirini ishlitishni chekleshke qayil qilishqa tiriship kéliwatqan idi.

Ehwaldin xewerdar kishilerning "Wal strét zhurnili" gha éytishiche, amérika hazir gherb döletliridiki ittipaqdashlirini bir yerge toplap, xitaygha qaritilghan éksportni kontrol qilish üchün ortaq tirishchanliq körsetmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet