Amérika xitay seweblik “Ottura musapilik yadro qorallar kélishimi” din chékinip chiqqan
2019.08.02
Amérika hökümiti 2-awghust küni 1980-yilliri sabiq sowét ittipaqi bilen imzalighan “Ottura musapilik yadro qoralla kélishimi” din resmiy chékinip chiqqan.
“Nyu-york waqti géziti” ning jüme küni xewer qilishiche, tramp hökümitidiki emeldarlar mezkur kélishimning xitay mesiliside amérikaning qolini baghlap qoyghanliqi, shundaqla rusiyening kélishimge emel qilmighanliqini bildürgen. Amérika tashqi ishlar ministiri mayk pompéyo jüme küni tiwittérgha yollighan uchurida amérikaning bu yil 2-féwral küni rusiyege “Ottura musapilik yadro qorallar kélishimi” ge emel qilish heqqide 6 ayliq sürük bergen bolsimu, rusiyening buninggha emel qilmighanliqini bildürgen. Pompéyo: “Shunga bu kélishim bügün resmiy bikar qilindi. Bashqilar bu kélishimge xilapliq qiliwatqan ehwalda amérika uninggha emel qilish terepdari bolmaydu” dégen.
Lékin “Nyu-york waqti géziti” ning xewiride ilgiri sürüshiche, rusiye amérikaning kélishimdin chékinip chiqishidiki birdin bir amal emes iken. Xewerde hökümetning xitayni prézidént trampning kélishimdin chékinip chiqishidiki yene bir amil dep körsetkenliki ilgiri sürülgen. Xewerde qeyt qilinishiche, nöwette amérika bu yil yaz axirlirida ottura musapilik bashqurulidighan bomba siniqi élip bérishni pilanlimaqta iken. Xewerde yéngi bashqurulidighan bombilarning rusiyege qaritilmaydighanliqi, uning xitaygha qaritilishi mumkinliki tekitlen'gen.
1987-Yili resmiy ijra qilinishqa bashlighan “Ottura musapilik yadro qorallar kélishimi” amérika bilen sabiq sowét ittipaqi otturisida imzalan'ghan bolup, bu kélishim eyni waqitta xitayni öz ichige almighan iken. Mutexessislerning ilgiri sürüshiche, bu ehwal xitayning her xil bashqurulidighan bombilarni tereqqiy qildurushigha purset yaritip bergen. “Nyu-york waqti géziti” ning xewiride qeyt qilinishiche, nöwette prézidént tramp rusiye bilen xitayni öz ichige alghan bir kélishim tüzüsh terepdari bolsimu, lékin xitay buni ret qilmaqta iken.