Хитай американиң әқлий мүлк тәкшүрүшини мәсулийәтсизлик дәп әйиблиди

Мухбиримиз шөһрәт һошур
2017.08.21

Америка президенти өткән дүшәнбә хитайниң әқлий мүлк оғрилаш қилмишини тәкшүрүш һәққидә буйруқ чүшүргәндин кейин, җүмә күни америка сода вакаләтчиси алақидар тәкшүрүшни башлиған иди.

Хитай тәрәп 21-авғуст буниңға қаттиқ наразилиқ билдүрди. Хитай наразилиқ баянатида американиң бу мәсилидә бир тәрәплимә мәнпәәтпәрәслик қиливатқанлиқини вә көп тәрәп мәнпәитигә һөрмәт қилиши керәкликини илгири сүргән.

Хитай баянатчи йәнә, америка содида хитайниң мәнпәәтини чәткә қаққан әһвалда бейҗиңниңму өз мәнпәәтини қоғдайдиған тәдбирләрни алидиғанлиқини билдүргән.

Узундин буян икки тәрәп арисида давам қиливатқан талаш-тартиштин қариғанда, хитай хәлқара содида чәтәл ширкәтлиридин техникисини хитай ширкәтлири билән ортақлишишни тәләп қилмақта, чәтәл әқлий мүлүклириниң оғрилинишиға көз юммақта.

Материялларда көрситилишичә. Америка сода қануниниң 1974-йили мақулланған 301-маддиси бойичә америка президенти америка ширкәтлириниң мәнпәәти дәхлигә учриған тәқдирдә, чәтәл маллириға чегра беҗини ашуруш қатарлиқ тәдбирләрни қоллиниш һәққидә өз алдиға қарар бериш һоқуқиға игә.

Хәвәрләрдә йәнә, хитай тәрәпниң һазирға қәдәр американиң 600 милйон доллар қиммитидики әқлий мүлүклирини оғрилиғанлиқи йезилмақта. Хитай тәрәп болса һәрқайси тәрәпләрниң әқлий мүлүк мәнпәәтини қоғдашқа давамлиқ тиришчанлиқ көрситиватқанлиқини илгири сүрмәктә. Ройтирсниң бүгүнки бу һәқтики хәвиридә, икки тәрәп арисидики сода маҗирасиниң мәзкур тәкшүрүшниң кейинки басқучлирида йәниму кәскинлишиш еһтималлиқи әскәртилгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.