Amérika dölet mejlisi dunya bankisining xitaydiki "Insaniyetke qarshi jinayet" ke qerz bérish mumkinchilikini sürüshtürdi

Muxbirimiz alim séytof
2019-08-23
Élxet
Pikir
Share
Print

Amérika dölet mejlisi xitay ishliri komitétining ikki re'isi - awam palata ezasi kristofér smit bilen kéngesh palata ezasi marko rubiyo jüme küni dunya bankisining prézidénti dawid malpasqa mektup yollap, dunya bankisining shinjang ma'arip nazaritining bir téxnikiliq terbiyilesh qurulushigha 50 milyon dollar qerz bérish mesilisini sürüshtürdi. Ular xétide, xitay hökümitining bir milyondin artuq Uyghur, qazaq we bashqa türkiy musulman milletlerni jaza lagérigha solighan bir waqitta, özlirining dunya bankisining Uyghur rayonidiki "Shinjang téxnika we ishtin sirtqi ma'arip we terbiyilesh qurulushi" gha qerz pul bergenlikige köngül bölidighanliqini bildürdi.

Ular xétide: "Biz dunya bankisining bu qerz pulni shinjang Uyghur aptonom rayonida keng kölemde jaza lagérlirining meydan'gha kélishidin burun bérilgenlikini bilimiz. Shundaqtimu biz dunya bankisining xitay hökümiti keng kölemde adem tutqun qilip, özining siyasitini qoghdap teshwiqat qiliwatqan bir waqitta, bina qurulushi pulini öz ichige alghan qerz pulini dawamliq yetküzüp bergenlikige köngül bölüwatimiz" dégen.

Ular bu wejidin dunya bankisining prézidéntidin özliri sorighan 3 muhim so'algha yazma shekilde jawab bérishni telep qilghan. Ular bu 3 so'alida, dunya bankisining qerz puli bergen bu qurulushining jaza lagéri bilen munasiwiti bar-yoqluqi, bu munasiwet bilen ichki tekshürüsh élip barghan‏-barmighanliqi, bu qerzning meqsiti 5 mekteptiki az sanliq milletlerge yardem qilishni asas qilghan bolsimu, emma bu mekteplerdin lagérgha élip kétilgenlerning bar-yoqluqini tekshürgen-tekshürmigenliki, shundaqla dunya bankisining bu qurulushqa qerz pul bérishni toxtitish pilanining bar-yoqluqi we Uyghur rayonidiki bashqa qurulushlar bilenmu arilashqan-arilashmighanliqi üstide chüshendürüsh bérishni telep qilghan.

Toluq bet