Президент трамп хитайниң 75 милярд долларлиқ америка мәһсулатиға баҗ қойғанлиқиға қаттиқ инкас қайтурди

Мухбиримиз әркин
2019-08-23
Елхәт
Пикир
Share
Принт

Президент трамп 23‏-авғуст күни твиттерда баянат елан қилип, хитайниң 75 милярд долларлиқ америка мәһсулатиға баҗ қойғанлиқиға қаттиқ инкас қайтурди. Президент трамп баянатида, американиң нурғун йиллар мабәйнидә хитайға нурғун пулини тартқузуп қойғанлиқи, хитайниң америка әқлий мүлкини оғрилап, өзлирини нурғун зиянға учритиватқанлиқини билдүргән.

Хитай һөкүмити 23‏-авғуст күни аптомобил вә аптомобил запчаслирини өз ичигә алған 5078 хил америка мәһсулатиға баҗ қойидиғанлиқини елан қилған. 

Көзәткүчиләр, хитайниң бу қарарини президент трампниң 15‏-авғуст күни елан қилған 300 милярд долларлиқ хитай импорт мәһсулатиға таможна беҗи қоюш қарариға қарши елинған өч елиш тәдбири, дәп қаримақта. Лекин, президент трамп баянатида, американиң хитайға еһтияҗи йоқлуқини, американиң әһвали хитайсиз техиму яхши болидиғанлиқини билдүрди. У мундақ деди: «дөлитимиз нурғун йиллар мабәйнидә хитайға трилйонлиған долларни әхмәқләрчә тартқузуп қойди. Улар һәр йили бизниң милярдлиған доллар әқлий мүлкимизни оғрилиди вә оғрилашни давамлаштурмақчи болуватиду. Бизниң хитайға еһтияҗимиз йоқ, бизниң әһвалимиз хитайсиз техиму яхши болиду. Униң ашкарилишичә, у америка ширкәтлиригә хитайдин башқа дөләтләргә йөткилиш һәққидә йолйоруқ бәргән. У йәнә буниң «америка үчүн зор пурсәт» икәнликини әскәртип, американиң федератсийә тез йолланмиси, амазон, UPS вә почтихана қатарлиқ почта-алақә орунлириға хитайдин яки башқа һәр қандақ җайдин фентанил селишни чәкләш һәққидә йолйоруқ бәргәнлики, фентанилниң һәр йили 100 миң америкалиқниң җениға замин болуватқанлиқи, ши җинпиң фентанилни чәкләйдиғанлиқини билдүргән болсиму, лекин чәклимигәнликини билдүрди.

Пикирләр (0)
Share
Толуқ бәт