Американиң муавин президенти камала һаррисниң сингапор вә вейтнамда қилған сөзи хитайниң ғәзипини кәлтүргән

Мухбиримиз җәвлан
2021-08-25
Share

Американиң муавин президенти камала һаррис шәрқий-җәнуби асияға қилған зиярити давамида, 24-авғуст сингапорда сөз қилип, хитайниң җәнуби деңизда тәвәлик һоқуқи талишиш вә қошна дөләтләрниң игилик һоқуқиға тәһдит селиш қилмишини қаттиқ әйбләп, американиң бу дөләтләр билән бирлишип, тинч вә ечиветилгән тинч окян райони бәрпа қилидиғанлиқини тәкитлигәниди.

Иккинчи күни камала һаррис вейтнамға зиярәткә барғанда сөз қилип, хитайниң җәнубий деңиздики кеңәймичиликини тосуш үчүн американиң униңға қарши бесимни күчәйтидиғанлиқини, вейтнамниң хитайға тақабил туруп, өз деңиз тәвәликини қоғдишиға ярдәм беридиғанлиқини билдүргән.

Ройтрес агентлиқиниң хәвиригә қариғанда, камала һаррисниң бу икки күндә хитайни арқиму арқа әйиблиши вә шәрқий-җәнубий асия дөләтлиригә мәдәт бериши хитайниң оғисини қайнатқан. Буниңдин илгириму, американиң афғанистандин әскәр чекиндүрүшини "мәғлубийәт вә малиманчилиқ" дәп тохтимай әйибләп келиватқан хитай, камала һаррисниң бу дипломатик паалийәтлиридә қилған сөзлиригә чидап туралмиған.

Хитай ташқи ишлар министирлики 25-авғуст күни камала һаррисниң сөзлиригә рәддийә қайтуруп, американи "башқа дөләтләрниң ишиға арилашти, район тинчлиқни бузди" дәп әйиблигән. Хитайниң дөләт таратқулири камала һаррисни "хитай билән шәрқий-җәнубий асия дөләтлири арисиға бөлгүнчилик салди," дәп тәнқидлигән.

Тәһлилчиләрниң билдүрүшичә, американиң муавин президенти камала һаррисниң сингапор билән вейтнамда елип бериватқан 7 күнлүк зиярити американиң дуня миқясида хитайға қарши елип бериватқан дипломатик паалийәтлириниң бир қисми икән. Хитайниң узундин бери җәнуби деңизда иғвагәрчилик қилиши шәрқий-җәнубий асиядики дөләтләрниң игилик һоқуқи, һинди-тинч окян райониниң тинчлиқи, бихәтәрлики вә сода йоллириниң раванлиқиға тәһдит елип кәлгән болуп, америка бу райондики мәнпәәтини қоғдаш үчүн "төт дөләт иттипақи" ни қуруп чиқип, хитайни пәйлидин яндурған. Нөвәттә, американиң афғанистандин әскәр чекиндүрүп, асаслиқ күчини хитайға қаритидиғанлиқини җакарлишиму хитайни қаттиқ биарам қилған. Хитайниң камала һаррисниң сөзлиригә ғәзәблинип, американи әйблиши дәл ашу сәвәбтин болуши мумкин икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт