Amérikaning mu'awin prézidénti kamala harrisning sin'gapor we wéytnamda qilghan sözi xitayning ghezipini keltürgen

Muxbirimiz jewlan
2021-08-25
Share

Amérikaning mu'awin prézidénti kamala harris sherqiy-jenubi asiyagha qilghan ziyariti dawamida, 24-awghust sin'gaporda söz qilip, xitayning jenubi déngizda tewelik hoquqi talishish we qoshna döletlerning igilik hoquqigha tehdit sélish qilmishini qattiq eyblep, amérikaning bu döletler bilen birliship, tinch we échiwétilgen tinch okyan rayoni berpa qilidighanliqini tekitligenidi.

Ikkinchi küni kamala harris wéytnamgha ziyaretke barghanda söz qilip, xitayning jenubiy déngizdiki kéngeymichilikini tosush üchün amérikaning uninggha qarshi bésimni kücheytidighanliqini, wéytnamning xitaygha taqabil turup, öz déngiz tewelikini qoghdishigha yardem béridighanliqini bildürgen.

Roytrés agéntliqining xewirige qarighanda, kamala harrisning bu ikki künde xitayni arqimu arqa eyiblishi we sherqiy-jenubiy asiya döletlirige medet bérishi xitayning oghisini qaynatqan. Buningdin ilgirimu, amérikaning afghanistandin esker chékindürüshini "Meghlubiyet we malimanchiliq" dep toxtimay eyiblep kéliwatqan xitay, kamala harrisning bu diplomatik pa'aliyetliride qilghan sözlirige chidap turalmighan.

Xitay tashqi ishlar ministirliki 25-awghust küni kamala harrisning sözlirige reddiye qayturup, amérikani "Bashqa döletlerning ishigha arilashti, rayon tinchliqni buzdi" dep eyibligen. Xitayning dölet taratquliri kamala harrisni "Xitay bilen sherqiy-jenubiy asiya döletliri arisigha bölgünchilik saldi," dep tenqidligen.

Tehlilchilerning bildürüshiche, amérikaning mu'awin prézidénti kamala harrisning sin'gapor bilen wéytnamda élip bériwatqan 7 künlük ziyariti amérikaning dunya miqyasida xitaygha qarshi élip bériwatqan diplomatik pa'aliyetlirining bir qismi iken. Xitayning uzundin béri jenubi déngizda ighwagerchilik qilishi sherqiy-jenubiy asiyadiki döletlerning igilik hoquqi, hindi-tinch okyan rayonining tinchliqi, bixeterliki we soda yollirining rawanliqigha tehdit élip kelgen bolup, amérika bu rayondiki menpe'etini qoghdash üchün "Töt dölet ittipaqi" ni qurup chiqip, xitayni peylidin yandurghan. Nöwette, amérikaning afghanistandin esker chékindürüp, asasliq küchini xitaygha qaritidighanliqini jakarlishimu xitayni qattiq bi'aram qilghan. Xitayning kamala harrisning sözlirige ghezeblinip, amérikani eyblishi del ashu sewebtin bolushi mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet