Amérikaning urush paraxoti xitayning jenubiy déngizdiki sün'iy arallirigha yéqin jayda heriket qilghan
2019.08.29
CNN Ning xewer qilishiche, 28-awghust charshenbe küni amérika déngiz armiyesining bir urush paraxoti xitayning jenubiy déngizda yasiwalghan sün'iy arallirigha 12 déngiz mili kélidighan jayda seper qilish arqiliq bu orunlarning xelq'ara qanunlar asasidiki erkin seper rayoni yene bir qétim tekitligen.
Amérika déngiz armiyesi 7-batalyonining bayanatchisi komandir rin momsin bu heqtiki bayanatida bu qétimliq heriketning jenubiy déngizning xelq'ara qanunlargha asasen déngiz seperlirige ochuqluqini tekitlesh we bu orunlardiki chékidin ashqan igilik hoquqi telep qilish qilmishlirigha qarshi turush üchün élip bérilghanliqini bildürgen.
CNN Ning bildürüshiche, amérika urush paraxotining herikiti jeryanida xitaygha tewe bir herbiy paraxot ulargha egeshken, emma ikki terep arisida sürkilish chiqmighan.
Biraq xitay azadliq armiyesi jenubiy qisimlirining bayanatchisi li xu'amin charshenbe küni amérikaning yuqiriqi herikitini tenqid qilip “Amérika déngiz armiyesining zomigerliki jenubiy déngizning rayon tinchliqi we muqimliqigha éghir ziyan salmaqta,” dégen.
Amérika déngiz armiyesi qerellik halda jenubiy déngizda heriket qilish arqiliq jenubiy déngizning xelq'aragha ochuq ikenlikini we buning héchqandaq bir döletke tewe emeslikini tekitlep kelmekte. Düshenbe küni amérika dölet mudapi'e ministirliqi bir parche bayanat élan qilip, xitayning tinch okyan rayonidiki xelq'ara qanunlargha xilap qilmishlirini tenqid qilghan. Amérika yene xitayning wiyétnamning jenubiy déngizdiki néfit we gaz qidirish heriketlirige dexli qiliwatqanliqini tenqid qilip “Xitay bundaq zomigerlik wasitiliri arqiliq qoshnilirining ishenchige we xelq'ara jem'iyetning hörmitige érishelmeydu,” dégen.