Америка һөкүмити хитайни қолға елинған паалийәтчиләрни қоюп беришкә чақирди

Мухбиримиз җүмә
2015-09-02
Share

Америка һөкүмити сәйшәнбә күни хитайдин өткән айда қолға елинған кишилик һоқуқ паалийәтчилирини қоюп беришини тәләп қилди.

Давид саперстейн америка һөкүмитиниң хәлқара диний әркинликкә мәсул алий һоқуқлуқ әлчиси. У 20-авғусттин 28-авғустқичә хитайда зиярәттә болған вә хитайниң мунасивәтлик һөкүмәт хадимлири, диний саһә затлири, аммиви тәшкилат вәкиллири билән көрүшкән.

Саперстейн әпәндиниң ахбарат саһәсигә билдүрүшичә, хитай даирилири униң билән көрүшүшкә һазирланған, яки униң билән көрүшкән диний затларни вә кишилик һоқуқ паалийәтчилирини тутқун қилған.

Униң ейтишичә, буларниң бири 25-авғуст тутуп кетилгән кишилик һоқуқ адвокати җаң кәй икән. Җаң кәй бир гуруппа адәм билән бир йәргә йиғилип саперстейн әпәнди билән көрүшүшкә тәйярлиқ қиливатқинида тутулған.

Буни бир қәбиһлик, дәп атиған давид саперстейн мундақ деди: булар бизни толиму биарам қилди. Биз һөкүмәт даирилирини кишилик һоқуқ паалийәтчилири вә диний йетәкчиләрни дәрһал қоюп беришкә чақиримиз.

У йәнә өзи билән көрүшмәкчи болған, яки көрүшкән диний затларниң тутқун қилинишини һәрқандақ сәвәб билән ақлиғини болмайдиғанлиқини билдүрди.

У хитайдин қайтип келип елан қилған баянатида хитайни уйғур мусулманлири, тибәт буддистлири вә христиан муритлириға қаритилған диний чәклимиләрни бикар қилишқа чақирған иди.

Ши җинпиң һакимийәт бешиға чиққандин кейин, хитайда кишилик һоқуқ адвокати вә паалийәтчилиригә қаритилған бастуруш һәссиләп күчәйтилгән.

Мәлум болушичә, пәқәт бу йил июлдила тутулған, сорақ қилинған адвокат вә кишилик һоқуқ паалийәтчилири 200 дин ешип кәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт