Amérika xitaydin tor bixeterlik qanunini ijra qilmasliqni telep qilghan

Muxbirimiz erkin
2017.09.26

Amérika hökümiti xitaydin uning 2016‏-yili maqullan'ghan “Tor bixeterlik qanuni” ni ijra qilmasliqini telep qilip, mezkur qanunning xelq'ara sodigha buzghunchiliq qilidighanliqini bildürgen. Xitayning “Tor bixeterlik qanuni” 2016‏-yili noyabirda maqullinip bu yil 6‏-aydin bashlap resmiy ijra qilinishqa bashlighan idi.

Mezkur qanun kishilik hoquq teshkilatliriningla emes, belki gherb hökümetlirining we xitaydiki chet'el karxanilirining endishisini qozghap kelgen. Ular, bu qanunning xitaydiki chet'el karxanilirining soda mexpiyetliki we eqliy mülk hoquqigha dexli qilidighanliqini eskertip kelgen idi.

Xitayning “Tor bixeterlik qanuni” da yerlik we chet'el karxanilirining bixeterlik kontrolluqi, tor qollan'ghuchilirining sanliq uchurini amanliq organlirigha tapshurush telep qilin'ghan.

Roytérs agéntliqining xewer qilishiche, dunya soda teshkilati seyshenbe küni amérikaning mezkur organ'gha yollighan bu heqtiki bir höjjitini élan qilghan.

Amérikaning d s t gha yollighan höjjitide, eger bu qanun toluq ijra qilinishqa bashlisa, “Xitayning bu tedbiri sodigha tosqunluq we dexli yetküzidu shundaqla sodidiki chégra halqighan normal uchur almashturushni cheklimige uchritidu” déyilgen.

Amérikaning höjjitide yene, özlirining bu endishilirini yuqiri derijilik xitay emeldarlirigha we alaqidar da'irilerge yetküzgenlikini bildürüp, “Biz xitaydin bu endishilirimiz hel qilinishtin burun bu qanunni ijra qilmasliqni telep qilduq” dep körsitilgen. Mezkur qanun ilgiri xelq'ara kishilik hoquq organliri, teshkilatliri, Uyghur, tibet teshkilatliri we xitay öktichilirining tenqidige uchrighan.

Uyghur teshkilatliri bu qanunning Uyghurlarning intayin cheklik tor erkinlikini téximu qattiq boghidighanliqini bildürüp kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.