Uyghur teshkilati amérikaning xitay bilen bixeterlik hemkarliqi ornatmasliqi kéreklikini bildürdi

Muxbirimiz erkin
2017-09-28
Share

Amérikidiki "Uyghur kishilik hoquq qurulushi" teshkilati bügün "Nyu-york waqti géziti" de maqale élan qilip, amérikaning xitay hökümiti bilen Uyghur élidiki bixeterlik herikiti mesiliside hemkarlashmasliqi kéreklikini bildürdi.

Mezkur maqale "Nyu york waqti géziti" ning 17-séntebir élan qilghan bash maqalisige qarita élan qilin'ghan. "Nyu york waqti géziti" ning 17‏-séntebir élan qilghan bash maqaliside, amérika bilen xitayning térrorluqqa qarshi hemkarliq élip bérishi kéreklikini, amérikaning da'ésh, xitayning sherqiy türkistan térrorluq mesilisi barliqini ilgiri sürüp, bu ularning ortaq hemkarliq nuqtisi ikenlikini tekitligen idi.

"Uyghur kishilik hoquq qurulushi" teshkilatining diréktori ömer qanatning namida yézilghan mezkur maqalida "Nyu york waqti géziti" ge reddiye bérilip mundaq déyilgen: "Xitayning térrorluq heriketlirige bergen tebiri müjmel hem éniq emes. Mesilen, proféssor ilham toxtining torda Uyghur mesilisini munazire qilghanliqi üchün oqughuchilirini "térrorluq guruhigha qatnishishqa qutratti" dep muddetsiz qamaqqa höküm qilinishi buning bir misalidur."

Maqalida xitay hökümitining terepsiz muxbirlarning Uyghur aptonom rayonigha kirip xewer bérishini cheklep kelgenliki, Uyghurlargha birdek "Térrorchi" mu'amilisi qiliwatqanliqi eskertilip, "Uyghurlarning weziyiti bilen da'ésh mesilisidiki endishilerni sélishturghili bolmaydu," déyilgen. Maqalida yene xitay hökümitining ottura sherqtiki qoralliqlarning xitaygha qaytip barghanliqigha da'ir héchqandaq delil körsitip baqmighanliqi, ularning Uyghur aptonom rayonida basturushni kéngeytip, kishilerni xalighanche "Yépiq terbiyelesh merkezliri" ge solawatqanliqi, chet'elde oquwatqan oqughuchilarning a'ilisige tehdit sélip, ularni mejburi qayturup kétiwatqanliqi tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.