Amérika dölet ishlar ministiri tillérson xitay ziyaritini bashlidi

Muxbirimiz erkin
2017-09-29
Share

Amérika dölet ishlar ministiri réks tillérson 28-séntebir özining xitay ziyaritini bashlidi. Bu tillérsonning bu yil féwral mezkur wezipige olturghandin béri xitaygha qilghan 2‏-qétimliq ziyariti.

U, peyshenbe küni xitay ziyaritini bashlashtin sel burun muxbirlargha melumat bérip, xitay sepirining asasliq küntertipi prézidént trampning bu yil noyabirda élip baridighan xitay ziyaritige teyyarliq qilish ikenlikini bildürgen idi.

Tillérson bu sözni peyshenbe küni xitayning mu'awin bash ministiri lyu yendong bilen washin'gtonda ötküzgen amérika-xitay ijtima'iy we medeniyet di'alogidin kéyin muxbirlargha bergen bayanatida qilghan.

U: "Biz prézidént trampning bu muhim ziyaritige teyyarliq qiliwatimiz, shunga, biz bu ziyaretning küntertipini muzakire qilimiz. Andin biz bashqa bir qatar muhim mesililerni sözlishimiz. Elwette shimaliy koréye mesilisi bizning söhbet témimiz bolidu" dégen idi.

Xitay hökümiti peyshenbe küni tillérsonning xitay sepiri bashlinishtin sel burun xitaydiki shimaliy koréye shirketlirini we uning bilen shérik karxanilarni 120 kün ichide taqaydighanliqini jakarlighan.

Prézidént tramp buningdin bir hepte awwal memuriy buyruq élan qilip, shimaliy koréye bilen soda qilidighan herqandaq shirketni jazalaydighanliqini bildürgen idi.

Amérika dölet ishlar ministirliqi bayanatchisi hetér na'u'ért peyshenbe küni muxbirlargha bergen bayanatida, tillérsonning xitay ziyaritide yene, ular bilen soda we meblegh sélish mesililirini muzakire qilidighanliqini bildürgen.

Hetér na'u'értning ashkarilishiche, tillérson bu sepiride xitay tashqi ishlar ministiri wang yi, dölet komissari yang jyéchi, xitay re'isi shi jinping bilen söhbet ötküzidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.